Ўзбекистон ва АҚШ 100 млрд долларли истиқболли лойиҳаларни шакллантирди

Ўзбекистон президенти Шавкат Мирзиёев 22 сентябрь куни ўзига ажратилган резиденцияда АҚШ президентининг Жанубий ва Марказий Осиё бўйича махсус элчиси Сержио Горни қабул қилди, деб хабар бермоқда давлат раҳбари матбуот хизмати.

Учрашув Нью Йорк шаҳрида БМТ Бош ассамблеяси 80-сессиясининг юбилей тадбирлари доирасида бўлиб ўтди.

Учрашувда Ўзбекистон-АҚШ стратегик шериклик муносабатларини, жумладан, 5 сентябрь куни бўлиб ўтган телефон орқали мулоқотда эришилган келишувлар доирасида мустаҳкамлаш масалалари муҳокама қилинди.

Таъкидланишича, Нью-Йоркда АҚШнинг етакчи компаниялари билан самарали учрашув ва тадбирлар ўтказилди. Фуқаро авиацияси, тоғ-кон саноати, молия ва инновациялар, кимё, энергетика ва бошқа устувор йўналишларда умумий қиймати 100 млрд доллардан зиёд бўлган шартномалар ва истиқболли лойиҳалар портфели шакллантирилди.

Янги лойиҳаларни қўллаб-қувватлаш ва илгари суриш учун АҚШ Эксимбанки ва DFC жамғармаси имкониятларидан фойдаланиш, уларни амалга оширишни жадаллаштириш учун қўшма Мувофиқлаштирувчи қўмита таъсис этиш муҳимлиги қайд этилди.

Учрашувда томонлар хавфсизлик соҳасидаги ҳамкорлик, жумладан, терроризм ва ноқонуний миграцияга қарши курашиш масалаларини ҳам муҳокама қилди.

АҚШ Давлат департаменти Горнинг Мирзиёев билан учрашуви якунлари бўйича хабарида шундай деди: «Жорий йил охирида C5+1 форматининг 10 йиллигини нишонлашни интиқлик билан кутмоқдамиз!» «C5+1» (Марказий Осиё ва АҚШ) форматидаги юбилей саммитини Самарқандда ўтказиш режалаштирилмоқда.

Эслатиб ўтамиз, Ўзбекистон президенти АҚШ бизнеси билан учрашувда АҚШ компанияларининг мамлакатда муваффақиятли ишлашига шахсан кафолат беришини айтган. Инвесторларнинг лойиҳаларини қўллаб-қувватлаш учун Инвестиция вазирлигида АҚШ бўйича вазир ўринбосари лавозими жорий этилди. Мирзиёев ҳамкорликнинг тўртта устувор йўналишини кўрсатиб ўтди.

Давра суҳбати якунида вазирлик ва Ўзбекистон компаниялари АҚШнинг Boeing, Citigroup, Cleveland Clinic, Oppenheimer ва бошқа қатор ҳамкорлари билан келишувларга эришди. Ҳужжатлар транспорт, тоғ-кон саноати, энергетика, соғлиқни сақлаш ва юқори технологияларни қамраб олади.