Ўзбекистонда вазир ва ҳокимликка номзодлар коррупцияга қарши кураш режасини тақдим этиши керак бўлади

Олий Мажлис Қонунчилик палатаси 7 октябрь куни бўлиб ўтган йиғилишда вазир ва ҳоким лавозимига номзодлар парламент ҳамда кенгашларда коррупциянинг олдини олиш бўйича режа тақдим этиши шартлигини белгилайдиган қонун лойиҳасини иккинчи ўқишда маъқуллади.

Депутат Анвархон Темиров мазкур қонун кадрлар танлашда коррупцияга қарши курашиш механизмларини кучайтиришга қаратилганини таъкидлади.

Ҳужжат қабул қилинса, маҳаллий давлат ҳокимияти органлари тўғрисидаги қонунларга, Қонунчилик палатаси ва Вазирлар Маҳкамаси регламентларига ўзгартишлар киритилади.

«Қонун барча вазирлик ва идоралар томонидан маъқулланган. Давлат бюджетидан қўшимча маблағ талаб этилмайди. Ўйлаймизки, у коррупцияга қарши тизимли курашни давом эттириш учун мустаҳкам қонунчилик асосини яратади», — деди депутат.

Муҳокама чоғида депутат Шуҳрат Шарафутдинов «Коррупцияга қарши кураш» атамаси профилактика чораларини ҳам ўз ичига оладими-йўқлигига аниқлик киритди. Темировнинг таъкидлашича, бу коррупциянинг олдини олиш ва унга чек қўйишни ичига олган комплекс ёндашув.

Қонун лойиҳаси иккинчи ўқишда бир овоздан қабул қилинди, уни 123 депутат ёқлаб, олти нафар депутат бетараф қолди. Ҳужжат лойиҳаси Сенатга юборишдан олдин учинчи ўқишдан ўтиши керак бўлган бошқа қонун билан бирлаштирилади.

Gazeta аввалроқ хабар қилганидек, 2024 йилда Ўзбекистонда коррупцион жиноятлари учун 7354 киши жазоланди, бу ўтган йилга нисбатан 12,5% кўп. Коррупциядан зарар икки баравар ошди — 2,8 трлн сўм. Судланганлар ва зарарлар сони бўйича Андижон вилояти етакчи. Энг кўп судланганлар таълим ва соғлиқни сақлаш соҳаларидан бўлди.

Ўтган йили коррупция учун судланган ҳар беш кишидан бири озодликдан маҳрум қилинган. Бундай ҳукмлар бироз кўпайган бўлса-да, судланганларнинг 40 фоизидан кўпи ҳали ҳам ахлоқ тузатиш ишлари билан жазоланмоқда. Озодликни чеклаш шаклидаги ҳукмлар камайди, жарималар улуши эса ўсган.