Ўзбекистон президенти — Солженициннинг ўғлига: «Биз сизнинг оилангизни жуда ҳурмат қиламиз»

Ўзбекистон президенти Шавкат Мирзиёев Нью Йорк шаҳрига ташрифи чоғида 22 сентябрь куни АҚШнинг етакчи компаниялари раҳбарлари билан учрашув ўтказди. Қатнашчилар орасида McKinsey компаниясининг катта ҳамкори ва Марказий Осиё бўйича офиси раҳбари Ермолай Солженицин ҳам бор эди, у жаҳонга машҳур ёзувчи ва Нобель мукофоти соҳиби Александр Солженициннинг ўғлидир.

Ермолай Солженицин билан суҳбатда отасининг Тошкентда ўтказган вақтида ёзган асарини хотирлаб ўтди ва унинг оиласига ҳурмат изҳор этди.

«Сиз буюк инсоннинг фарзандисиз. У ҳақда жуда кўп эшитганман. Отангизнинг тақдири ҳам Тошкент билан боғлиқ. Жуда ёқимли. Унинг сўнгги китоби — „Саратон бўлими“ — у Ўзбекистонда касал бўлиб, шифо топган саратон касаллиги ҳақида. Биз ҳаммамиз сизнинг оилангизни жуда ҳурмат қиламиз», — деди Шавкат Мирзиёев («Ўзбекистон 24» телеканалининг «Менимча» дастуридан иқтибос).

Ермолай Солженицин (ўнгдан биринчи). Фото: Президент матбуот хизмати

Учрашувда, шунингдек, Traxys компанияси директорлар кенгаши раиси Алан Доктер, Колорадо геология мактаби вице-президенти Жон Бредфорд, FLSmidth компанияси катта вице-президенти Питер Фланаган, ва Go Green Partners компанияси бош директори Михаил Седой қатнашди.

Суҳбат Ўзбекистоннинг саноат, энергетика, геология ва барқарор ривожланиш соҳаларида Америка компаниялари билан ҳамкорликни кенгайтириш доирасида бўлиб ўтди.

«Саратон бўлими» ҳақида

Gazeta аввалроқ Александр Солженицин повесть сифатида белгилаган «Саратон бўлими» асари ғояси 1954 йилда Тошкентда дунёга келгани ҳақида ёзган эди. Сургундаги ёзувчи Тошкент тиббиёт институти ҳудудида жойлашган (ҳозир бу ерда Тошкент давлат стоматология институти фаолият юритмоқда) «ўн учинчи» саратон биносида даволанаётган эди.

Ўша давр хотиралари, шифокорлар ва бош қаҳрамон билан бир палатада бўлган беморлар романга асос бўлди. Ёзувчи тўрт йил: 1963 йилдан 1967 йилгача асар устида ишлади.

«Саратон бўлими»даги кўплаб қаҳрамонлар реал прототипларга эга. Шифокорлардан Людмила Донтсова образи нур бўлими мудираси Лидия Александровна Дунаева, Вера Гангарт эса даволовчи шифокор Ирина Емельяновна Мейке образидан олинган. Улар бўлғуси Нобель мукофоти совриндорининг ҳаётини сақлаб қолишади. Бино 2022 йил декабрида бузиб ташланган.