«Ўзбекистон Ғазода ўт очишни тўхтатиш бўйича эришилган келишувни олқишлайди» — ТИВ
ТИВ баёнотида Миср, Қатар ва Туркиянинг ушбу муҳим жараёнда мувофиқлаштирилган фаолияти ва уларнинг муҳим роли юқори баҳоланди. «Мазкур саъй-ҳаракатлар зўравонликни тез фурсатда тўхтатиш, гуманитар инқирозни енгиллаштириш ҳамда сиёсий мулоқотни тиклаш учун замин яратмоқда», — қайд этди вазирлик.
Ўзбекистоннинг ташқи офиси мамлакат доимо халқаро ҳуқуқ меъёрлари ва БМТ Хавфсизлик Кенгаши резолюциялари асосида Яқин Шарқда мустаҳкам ва адолатли тинчлик ўрнатилишини қўллаб-қувватлашини билдирди.
«Ўт очишни тўхтатиш вақтинчалик чора эмас, балки томонлар ўртасида хавфсизликни таъминлаш, барқарор ҳамжиҳатликни ўрнатиш ва ўзаро ишончни тиклашга қаратилган узоқ муддатли сиёсий ечим сари муҳим қадам бўлишига ишончимиз комил», — дейилади хабарда.
ТИВ Ўзбекистон Яқин Шарқда тинчлик, барқарорлик ва гуманитар енгилликни таъминлашга қаратилган халқаро саъй-ҳаракатларга конструктив ҳисса қўшишга тайёрлигини яна бир бор тасдиқлади.
Эслатиб ўтамиз, 9 октябрь куни АҚШ президенти Дональд Трамп Исроил ва ҲАМАС Ғазода тинчлик ўрнатиш режасининг биринчи босқичини амалга оширишга рози бўлганини маълум қилди. Бу босқич барча исроиллик гаровга олинганларни озод қилиш ва Исроил қўшинларини келишилган чизиққа олиб чиқишни ўз ичига олади.