Ўзбекистон ҲҲК Embraer C-390 Millennium ҳарбий-транспорт самолётларини олади

Ўзбекистон энг сўнгги C — 390 Millennium ҳарбий-транспорт самолётларини сотиб олмоқда, деб хабар берди Сингапурдаги авиасалонда Бразилиянинг Embraer компанияси. Мамлакат Мудофаа вазирлиги Ҳарбий-ҳаво кучлари Марказий Осиёда ушбу турдаги самолётларнинг биринчи фойдаланувчиси бўлади.

Хабарда айтилишича, C — 390 самолётлари асосан транспорт ва гуманитар миссияларда қўлланади, бу эса ҲҲВ имкониятларини сезиларли даражада кенгайтиради.

C — 390 Millennium — ўз синфидаги энг илғор ҳарбий-транспорт самолёти, бошқа ўрта ўлчамли ҳарбий-транспорт самолётларига қараганда кўпроқ юк (26 тонна) ташишга қодир, юқори тезликка (470 тугун) ва узоқроқ парвоз масофасига эга.

Embraer видеосидан кадр.

У юк ва қўшинларни ташиш, техника ва персонални ҳаводан тушириш, тиббий эвакуация, қидирув-қутқарув, ёнғинни ўчириш ва гуманитар ёрдам каби кенг кўламли вазифаларни бажара олади. Самолёт вақтинчалик ва тупроқли учиш-қўниш йўлакларидан парвоз қилиш ва қўниш имкониятига эга.

Ҳавода ёнилғи қуйиш учун тез ечилувчи ускуналар билан жиҳозланган ва KC — 390 деб аталувчи самолёт ҳам ёнилғи қуйувчи, ҳам ёнилғи олувчи сифатида қўлланиши мумкин.

«Millennium НАТО тизимлари билан тўлиқ мослашган ва, айниқса, мослашувчан жанговар операцияларга (Agile Combat Employment, ACE) тўғри келади», — дейилади хабарда.

C — 390 Millennium самолёти Бразилия, Португалия, Венгрия, Корея Республикаси, Нидерландия, Австрия, Чехия, Швеция, Словакия ва Литва ҳаво кучлари томонидан танланган.

Ўзбекистон ҲҲК ҳозирда Ил — 76 ва CASA C — 295 ҳарбий-транспорт самолётларидан фойдаланади.

Видео