Ўзбекистон 2030 йилгача сайёҳлар сонини 20 миллионга етказишни режалаштирмоқда

Шавкат Мирзиёев 1 апрель куни Ўзбекистонда ташриф билан бўлиб турган БMT Туризм бош котиби Шайха Носир Ал Новайсни қабул қилди, деб хабар бермоқда президент матбуот хизмати.

Учрашувда Ўзбекистон ва БМТнинг ушбу ихтисослашган муассасаси ўртасидаги кўп қиррали ва узоқ муддатли ҳамкорликни янада кенгайтириш масалалари кўриб чиқилди.

Сўнгги 8 йилда мамлакатга келган сайёҳлар сони 6 баробар кўпайиб, қарийб 12 млн нафарга етгани алоҳида қайд этилди. 2030 йилга қадар уларнинг сонини 20 миллионга, туризмнинг мамлакат ялпи ички маҳсулотидаги улушини эса 7 фоизга етказиш режалаштирилган.

Томонлар Ўзбекистон ва БМТ Туризм ўртасидаги ҳамкорлик ривожланиб бораётгани катта мамнуният билан қайд этди. 2023 йилда Самарқанд шаҳрида ташкилот Бош ассамблеяси муваффақиятли ўтказилгани, Халқаро туризм академияси ташкил этилгани, яқинда эса «Ипак йўлида туризм» мавзусидаги офиснинг очилиши бўлиб ўтиши таъкидланди.

Ўзбекистон ташаббуси билан БМТ Бош ассамблеясининг 2027 йилни Халқаро барқарор ва яшовчан туризм йили деб эълон қилиш тўғрисидаги резолюцияси қабул қилинди.

Суҳбат чоғида томонлар шерикликни янада ривожлантириш, жумладан, сайёҳлик соҳасида халқаро ҳуқуқий базани такомиллаштириш, қўшма лойиҳаларни амалга ошириш, экспертлик ва техник ҳамкорликни кенгайтириш, туризм соҳаси учун юқори малакали кадрларни тайёрлаш ниятида эканини қатъий тасдиқлади.