Иссиқхоналарни иситиш учун мазут ва шиналар ёққанлик учун йирик жарималар жорий этилди

Ўзбекистон Президенти 4 май куни Маъмурий жавобгарлик тўғрисидаги кодекснинг 88-моддасига ўзгартишлар киритиш ҳақидаги қонунни имзолади. Янги тартиб иссиқхоналар ва ишлаб чиқариш биноларини иситишда зарарли материалларни ёқиш учун жарималар жорий этишни назарда тутади. Мазкур нормалар 2026 йил 5 августдан кучга киради.

Ўзгартишларга кўра, махсус мўлжалланмаган жойларда ёқилғи, материал ва чиқиндиларни очиқ оловда ёқиш, шунингдек, иссиқхоналарни иситишда мазут, битум, автомобиль шиналари, полиэтилен плёнка, синтетик картон ва резинадан фойдаланиш қонунбузарлик деб ҳисобланади.

Биринчи қоидабузарлик учун фуқароларга 15 дан 25 базавий ҳисоблаш миқдоригача (6,18 млн сўмдан 10,3 млн сўмгача), мансабдор шахсларга эса 25 дан 50 БҲМгача (10,3 млн сўмдан 20,6 млн сўмгача) жарима қўлланилади.

Агар қоидабузарлик бир йил ичида такроран содир этилса, жарималар миқдори оширилади. Бунда фуқаролар учун 25 дан 50 БҲМгача (10,3 млн сўмдан 20,6 млн сўмгача), мансабдор шахслар учун эса 50 дан 70 БҲМгача (20,6 млн сўмдан 28,84 млн сўмгача) жарима белгиланади.

Қонуннинг қабул қилиниши атмосферага зарарли моддалар чиқарилишини қисқартириш ва мамлакатдаги экологик вазиятни яхшилашга қаратилган.