Шавкат Мирзиёев миссиясини якунлаётган Озарбайжон элчисига «Меҳнат шуҳрати» орденини топширди

Шавкат Мирзиёев 22 июнь куни Ўзбекистондаги дипломатик миссиясини якунлаётган Озарбайжоннинг фавқулодда ва мухтор элчиси Гусейн Гулиевни қабул қилди. Бу ҳақда Президент матбуот хизмати хабар қилди.

Давлат раҳбари Озарбайжон элчисининг самарали фаолияти ҳамда икки мамлакат ўртасидаги стратегик шериклик ва иттифоқчилик муносабатларини ривожлантириш ва мустаҳкамлашга қўшган шахсий ҳиссасини алоҳида қайд этди.

Сўнгги йилларда ўзаро товар айирбошлаш ҳажми каррасига ошгани, Озарбайжон сармояси иштирокида 280 та корхона ташкил этилди, Қўшма инвестиция компанияси таъсис қилингани таъкидланди.

Айни пайтда геология, қишлоқ хўжалиги, транспорт, шаҳарсозлик, тўқимачилик, фармацевтика ва бошқа тармоқлардаги кооперация лойиҳалари фаол паллага киргани айтилди.

Учрашув якунида давлат раҳбари элчи Гусейн Гулиевга Ўзбекистон билан Озарбайжон ўртасидаги кўп қиррали муносабатларини мустаҳкамлашга қўшган катта ҳиссаси учун «Меҳнат шуҳрати» орденини топширди.

Элчи, ўз навбатида, унинг дипломатик миссиясига берилган юксак баҳо ҳамда Ўзбекистон ва Озарбайжон ўртасидаги кенг кўламли ҳамкорлик ривожини ҳар томонлама қўллаб-қувватлаётгани учун мамлакат етакчисига миннатдорлик билдирди.

Эслатиб ўтамиз, Гусейн Гулиев 2022 йилда «Дўстлик» ордени билан ҳам мукофотланганди.