«Футболчиларимиз тажрибали жамоага қарши ўзининг кучли характерини кўрсатди» — Шавкат Мирзиёев

Шавкат Мирзиёев Ўзбекистон терма жамоасининг Жаҳон чемпионатидаги Колумбияга қарши ўйинидан (1:3) сўнг фикрларини билдирди. Бу акс этган видео Президент матбуот хизмати томонидан эълон қилинди.

«Ўзбекистон учун тарихий кун. Муросасиз, жуда қизғин кечган ўйинда футболчиларимиз жаҳон мундиалида биринчи марта жуда катта тажрибали жамоага қарши ўзининг кучли характерини кўрсатди. Осон эмас, 34 йилда биринчи марта биз кутган воқеа бўлди. Шунинг учун кучли характери, жисмоний тайёргарлиги ва иродасини яққол намоён этди десак, бу ҳам тўғри. Биз учун чемпионатдаги биринчи голимиз — бу ҳам ғалаба», — деди президент.

Давлат раҳбари ватанпарвар ва фидоий ёшлар билан фахрланиши ва улар ҳозирги Ўзбекистоннинг ҳақиқий қаҳрамонлари эканини қайд этди.

«Ҳали олдимизда жуда кўп имкониятлар борлигини кўрдинглар. Фарзандларим, қаҳрамонларим кўп нарсага қодир эканликларини ҳам билдирди. Шунинг учун фақат омад тилаймиз. Олға, Ўзбекистон», — деди Шавкат Мирзиёев.

Эслатиб ўтамиз, Футбол бўйича Ўзбекистон терма жамоаси Жаҳон чемпионати гуруҳ босқичининг илк турида Колумбияга 3:1 ҳисобида мағлуб бўлди. Ўзбекистоннинг мундиалдаги илк голини Аббосбек Файзуллаев киритди.

Ўзбекистон терма жамоаси навбатдаги учрашувни 23 июнь куни Тошкент вақти билан соат 22:00 да Португалияга қарши ўтказади.