Санъат Жуманиязов Янгийўл туманига ҳоким бўлди

Ўзбекистон Вазирлар Маҳкамасида ишлаб келган Санъат Шакирович Жуманиязов Тошкент вилояти Янгийўл туманига ҳоким этиб тасдиқланди. Бу ҳақда вилоят ҳокимлиги ахборот хизмати хабар берди.

Таъкидланишича, 14 июль куни Халқ депутатлари туман кенгашининг навбатдан ташқари сессияси бўлиб ўтди. Унда вилоят ҳокими Зойир Мирзаев туманни ижтимоий-иқтисодий ривожлантириш бўйича белгиланган вазифалар ижроси юзасидан танқидий-таҳлилий маъруза қилди.

Шундан сўнг, туман ҳокими лавозимида ишлаб келган Одилжон Атауллаев лавозимидан озод этилди. У бу вазифада 2023 йил август ойидан бери фаолият юритиб келаётганди. Ўшанда Зойир Мирзаев ҳудуддаги вазиятни танқид қилган ва «Янгийўл тумани ғалладан бўшаган ерларни ёқиб юбориш бўйича „чемпион“ бўлди. Ҳосилдорлик ҳам режадагидан паст», — деганди.

Бундан ташқари, 2024 йил охирида Ўзбекистонда 14 нафар ҳоким қиш мавсумига тайёргарлик кўришдаги камчиликлари учун ҳайфсан олган ва улар орасида Одилжон Атауллаев ҳам бор эди.

Эслатиб ўтамиз, худди шу тайинлов кунида «Навоий саноатни ривожлантириш комплекси» директори бўлиб ишлаб келган Наримонжон Исмоилов Тошкент вилояти Бекобод шаҳри ҳокими этиб тайинланди.