Рустам Жўраев Президент давлат хавфсизлик хизмати раҳбари этиб тайинланди
Бундан ташқари, президент фармони билан унга генерал-лейтенант ҳарбий унвони берилди, бунгача у генерал-майор эди.
Жўраев ушбу лавозимга тайинлангунга қадар, 2026 йилнинг январь ойидан буён ички ишлар вазирининг биринчи ўринбосари — ИИВ Жамоат хавфсизлиги департаменти бошлиғи лавозимида ишлаб келаётган эди.
У янги лавозимда 2020 йилнинг декабридан буён ПДХХга раҳбарлик қилиб келган Алишер Аброрович Усмоновнинг ўрнини эгаллади. Бир қатор ОАВ 17 июль куни кечқурун Усмоновнинг лавозимидан озод этилгани ҳақида хабар тарқатди.
Президент давлат хавфсизлик хизмати — президент, унинг оила аъзолари, собиқ президент ва унинг бутун ҳаёти даврида оила аъзолари, ташриф билан келган хорижий давлатлар раҳбарлари ва бошқа қўриқланувчи шахслар, шунингдек, уларга тегишли объектлар ва ҳаракатланиш йўналишлари хавфсизлиги учун масъул бўлган махсус давлат органидир.
Хизмат улар бўладиган жойлар ва транспорт воситаларини, шунингдек, хизматга берилган ёки президент ҳужжатлари билан белгиланган бинолар, иншоотлар, ер майдонлари, сув объектлари ва бошқа объектларни қўриқлайди. ПДХХ бевосита давлат раҳбарига бўйсунади ва унга ҳисобдордир.
Рустам Жўраев ҳақида
Рустам Жўраев 1968 йилда туғилган. 1994 йилда Ички ишлар вазирлиги академиясини тамомлаган.
1994−2008 йилларда ИИВ тизимида турли лавозимларда, 2008−2012 йилларда эса Президент аппаратида фаолият юритган.
2012−2015 йилларда Тошкент шаҳри Ички ишлар бош бошқармаси бошлиғи ўринбосари бўлган. 2015 йилда Наманган вилояти Ички ишлар бошқармасини бошқарган, сўнгра 2017 йилгача Хоразм вилояти ИИБга раҳбарлик қилган.
2017−2018 йилларда фавқулодда вазиятлар вазири лавозимида ишлаган.
2018 йилнинг февралидан 2020 йилнинг мартигача ички ишлар вазири ўринбосари — Тошкент шаҳри ИИББ бошлиғи лавозимида фаолият юритган, шундан сўнг Миллий гвардия қўмондони этиб тайинланган. У ушбу тузилмага 2020 йилнинг мартидан 2026 йилнинг январига қадар раҳбарлик қилган.