7 августдан Ўзбекистонда уй ҳайвонларини мажбурий рўйхатдан ўтказиш бошланади
Янги талаблар уй ҳайвонлари билан бир қаторда қишлоқ хўжалиги ҳайвонларига ҳам татбиқ этилади. Ветеринария паспорти ҳайвоннинг идентификация рақами, эгаси ҳақидаги маълумотлар, шунингдек, эмлаш ва даволаш ишлари тўғрисидаги маълумотлар киритиладиган расмий ҳужжат ҳисобланади.
Белгиланган тартибга кўра, ҳайвон эгалари уларни туғилганидан кейин қуйидаги муддатларда рўйхатдан ўтказиши шарт:
- йирик шохли қорамол, қўй, эчки ва туялар — 14 кун ичида;
- отлар — тўрт ойлик ёшга етгунга қадар;
- чўчқалар — 30 кун ичида;
- ит ва мушуклар — уч ойлик бўлгунга қадар.
Ветеринария паспортини олиш учун туман ёки шаҳар ветеринария бўлимига ариза ва шахсни тасдиқловчи ҳужжат билан мурожаат қилиш лозим.
Ҳайвонни давлат рўйхатига қўйиш ва ветеринария паспортини расмийлаштириш уч кун ичида амалга оширилади.
Айни пайтда амалдаги қонунчиликда ҳайвонларни мажбурий идентификация қилиш ва рўйхатдан ўтказиш тартиби белгиланган. Рўйхатдан ўз вақтида ўтказмаганлик учун жавобгарлик масаласи алоҳида норматив-ҳуқуқий ҳужжатлар билан тартибга солиниши мумкин.