Роналду Тошкентга келади: «Пахтакор» Осиё Чемпионлар лигасида «Ал-Наср»га қарши ўйнайди

Тошкентнинг «Пахтакор» клуби Осиё Чемпионлар лигасининг 2026/27 йилги мавсуми гуруҳ босқичида «Ал-Наср» жамоасига қарши майдонга тушади.

Қуръа натижаларига кўра, «Пахтакор» А саватнинг 4-жамоаси сифатида қайд этилди. Тошкентдаги уй учрашувларида клуб «Истиқлол», «Ал-Наср», «Трактор» ва «Ал-Қодисия» жамоаларига қарши ўйнайди.

Жамоанинг сафардаги рақиблари эса «Ал-Аҳли», «Эйр Форс», «Ал-Ҳилол» ва «Ал-Иттиҳод» бўлади.

Шу тариқа, португалиялик машҳур футболчи Криштиану Роналду фаолият юритаётган «Ал-Наср» Тошкентда «Пахтакор» меҳмони бўлади. Роналду учун бу Ўзбекистонга 2009 йилдан кейинги илк ташриф бўлиши кутилмоқда. У охирги марта Тошкентга 2009 йил 22 декабрда «Реал Мадрид» таркибида келган.

Ҳозирда 41 ёшли Роналду «Ал-Наср» сафида фаолиятини давом эттирмоқда. У профессионал фаолияти давомида 1000 та гол уриш тарихий кўрсаткичига яқинлашиб бормоқда.

«Пахтакор»нинг ҳар бир рақибга қарши қайси турда ва қайси санада майдонга тушиши кейинроқ маълум қилинади.