Ўзбекистон ва Эрон ўртасида сиёсий маслаҳатлашувларнинг навбатдаги раунди Теҳронда ўтказилди
Учрашувда Ўзбекистон делегациясига ташқи ишлар вазирининг биринчи ўринбосари Баҳромжон Аълоев, Эрон делегациясига эса ташқи ишлар вазири ўринбосари Мажид Тахти-Раванчи раҳбарлик қилди.
Музокараларда Ўзбекистон–Эрон муносабатларининг бугунги ҳолати ва уларни янада ривожлантириш истиқболлари муҳокама қилинди. Томонлар сиёсий мулоқотни мустаҳкамлаш ва амалий ҳамкорликни кенгайтириш масалаларига алоҳида эътибор қаратди.
Шунингдек, савдо-иқтисодий ва инвестициявий ҳамкорликни ривожлантириш, транспорт-транзит алоқаларини кенгайтириш, маданий-гуманитар соҳадаги муносабатларни фаоллаштириш масалалари кўриб чиқилди.
Томонлар халқаро ва минтақавий ташкилотлар доирасидаги ҳамкорлик, шунингдек, ўзаро манфаатли долзарб минтақавий ва халқаро масалалар юзасидан фикр алмашди.
Учрашув якунида икки давлат ташқи сиёсат идоралари ўртасида мунтазам сиёсий мулоқотни давом эттириш ва икки томонлама ҳамкорликни янада мустаҳкамлашга қизиқиш билдирилди.