Беларусь Ўзбекистонга миллий валюталардаги ҳисоб-китобларни кўпайтиришни таклиф қилди

Беларусь Ўзбекистон билан ўзаро ҳисоб-китобларда миллий валюталардан фойдаланишни кенгайтиришни таклиф қилди. Бу ҳақда Беларусь Миллий банки бошқаруви раиси Роман Головченко Ўзбекистоннинг Беларусдаги элчиси Нуриддин Мамажонов билан учрашувда маълум қилди.

Унинг сўзларига кўра, 2025 йилда Беларусь ва Ўзбекистон ўртасидаги товар айирбошлаш ҳажми 30 фоиздан ортиққа ошган. 2026 йилнинг биринчи ярмида ҳам ижобий динамика сақланиб қолган.

Головченко икки давлат ўртасида сиёсий, савдо ва иқтисодий соҳаларда ўзаро ишонч даражаси юқори эканини таъкидлади.

Унинг баҳолашича, икки мамлакат иқтисодиёти кўлами ва товар айирбошлашнинг мувозанатли эканини ҳисобга олганда, ҳозир миллий валюталардаги ҳисоб-китоблар улушини ошириш учун қулай шароитлар шаклланган.

Бундай ёндашув ташқи савдо операцияларида учинчи давлат валюталаридан фойдаланишга бўлган эҳтиёжни камайтириши ва икки мамлакат компаниялари ўртасидаги ҳисоб-китобларни соддалаштириши мумкин.

Беларусь Миллий банки раҳбари бундай ҳисоб-китобларни кенгайтириш учун икки давлат ҳукуматлари ва марказий банкларининг ҳамкорлиги зарурлигини таъкидлади.

Томонлар, шунингдек, молиявий ҳамда савдо-иқтисодий ҳамкорликни янада ривожлантириш масалаларини муҳокама қилди.