US Open-2026. Камилла Раҳимова дунёнинг биринчи рақамли ракеткасига қарши кортга чиқади

Нью-Йорк шаҳрида мукофот жамғармаси 108 миллион долларни ташкил этувчи “Катта Дубулға” туркумига кирувчи US Open — 2026 турнири қизғин давом этмоқда. Унда иштирок этаётган Ўзбекистоннинг иккинчи рақамли теннисчиси Камилла Раҳимова мусобақадаги муваффақиятли юришини давом эттиряпти.

Дастлаб 1/64 финалда турнирнинг 27-рақамли ракеткаси, чехиялик Барбора Крейчиковани (7:6, 6:2) мағлуб этган Раҳимова 1/32 финалда ҳам ишончли ўйин кўрсатди. У атиги 65 дақиқа давом этган баҳсда ўзининг WTA рейтингидаги энг яқин таъқибчи бўлиб турган испаниялик Оксана Селеҳметевани (93-ўрин) ҳеч қандай қийинчиликсиз 6:3, 6:0 ҳисобида таслим этди.

Учрашув давомида Камилла (WTA рейтингида 92-ўрин) битта эйс зарбасини амалга оширди ва умуман қўшхатога йўл қўймади. Эътиборлиси, бу теннисчиларнинг ўзаро олтинчи тўқнашуви бўлиб, Раҳимова ушбу ғалабадан сўнг ўзаро ўйинлардаги мувозанатни тиклади — 3:3.

Энди ўзбекистонлик теннисчи 1/16 финалда жаҳоннинг биринчи рақамли теннисчиси — беларуслик Арина Соболенкога қарши кортга чиқади. Соболенко иккинчи даврада россиялик Полина Ятченкони 6:1, 6:1 ҳисобида мағлубиятга учратган.

Камилла Раҳимова ва Арина Соболенко ўртасидаги учрашув 4 сентябрь куни Тошкент вақти билан соат 20:00 да бошланади. Бунга қадар ушбу теннисчилар ўзаро уч марта тўқнаш келган ва уларнинг барчасида беларуслик спортчининг қўли баланд келган.

Манба: daryo.uz