«Агар ғўддайган бойвачча пайдо бўлса, бирортангни кечирмайман» — президент

Ўзбекистон президенти Шавкат Мирзиёев 11 сентябрь куни ўтказилган йиғилишда хавфсизлик ҳудудларнинг инвестициявий жозибадорлиги ва бизнес ишончига бевосита таъсир қилишини таъкидлади.

Унинг сўзларига кўра, агар ҳокимият тартибни таъминлай олмаса, фақат иқтисодий йўналишдаги ишларнинг ўзи етарли эмас.

«Жиноятчиликни жиловламас эканмиз, ишда барака бўлмайди, тадбиркорлар келмайди. Мана шуни билинглар», — деди президент.

Мирзиёев инвесторлар нафақат мамлакатнинг иқтисодий имкониятларини, балки хавфсизлик даражасини ҳам баҳолашини таъкидлади.

«Ҳар бир тадбиркор ва компания олдин Ўзбекистон харитасини билади, аммо у ерда жиноятчиликни жиловлашга эришилган-эришилмаганини ҳам ҳисобга олади. Шунинг учун сен, ички ишлар вазири [Азиз Ташпулатов], ҳаммага намуна кўрсатишинг керак. Буни ҳамманг билинглар. Сизлар кичкина иш қилмаяпсизлар. Вақтинча иш қиламан деб ўйламанглар», — деди у ҳуқуқни муҳофаза қилувчи органлар раҳбарларига мурожаат қилиб.

Президент тинчлик ва осойишталикни сақлаш учун ҳуқуқни муҳофаза қилувчи органлар янада жадал ишлаши кераклигини таъкидлади.

«Шукр дейишимиз керак бу тинчлик учун. Лекин халқимиз тинч яшаши учун биз икки карра кўп ишлашимиз керак. Одамлар тинч, бемалол ўз уйида эмин-эреин ҳеч нарсадан ва ҳеч кимдан қўрқмасдан яшаши керак».

Мирзиёев, шунингдек, таъсирли ёки бой одамларнинг жазосиз қолишига йўл қўйиб бўлмаслигини алоҳида таъкидлади. «Агар бирорта ғўддайган бойвачча пайдо бўлса, бирортангни кечирмайман. Мана шуни ҳамма билиши керак. Давлат бор бўлиши керак. Ана шунда бизда бирлик ва ҳамжиҳатлик бўлади, одамлар бизга ишонади», — деди давлат раҳбари.

Чапдан ўнгга: Божхона қўмитаси раиси Акмалхўжа Мавлонов, фавқулодда вазиятлар вазири Азизбек Икрамов, Миллий гвардия қўмондони Баҳодир Ташматов, Давлат хавфсизлик хизмати раиси Баҳодир Қурбонов, ички ишлар вазири Азиз Ташпулатов.

Декабрь ойи охирида президент Ўзбекистонда жиноий тузилмаларнинг ўзини қонундан устун қўйиш ва бизнесга босим ўтказишга уриниш ҳолатлари кузатилаётганини айтган эди. Бунга спортчилар ҳам жалб этилмоқда. У давлатда бундай гуруҳлар фаолиятига чек қўйиш учун етарли куч борлигини таъкидлаб, парламентни қонунларни кучайтиришга чақирган эди.