Ўзбекистонда кредит олиш учун талаб этиладиган ҳужжатлар сони қисқартирилади
Банклар фаолияти янги кредит маҳсулотлари сони билан эмас, балки молиялаштирилган корхоналарнинг ўсиши билан баҳоланиши керак. Бу ҳақда президент Шавкат Мирзиёев Қашқадарё вилоятига ташрифи чоғида маълум қилди.
Ҳозирда кредит олиш учун 102 турдаги ҳужжат талаб этилмоқда. Уларнинг 53 таси ахборот тизимларида мавжуд, яна 22 таси эса кредитлаш жараёнига бевосита алоқадор эмас. Президент ортиқча талабларни бекор қилиш бўйича топшириқ берди.
Шунингдек, кредитларни фақат гаров эвазига эмас, балки пул оқимлари ва аниқ буюртмаларни ҳисобга олган ҳолда ажратиш зарурлиги таъкидланди. Аввалроқ Андижон вилоятида ушбу ёндашувни жорий этиш ва 20 та янги молиявий маҳсулот ишлаб чиқиш топширилган эди. Энди бу тизим Қашқадарё вилоятида ҳам самара бериши керак.
Мазкур чоралар маҳаллалардаги ташаббусларни молиялаштиришга кўмаклашиши ва янги иш ўринлари яратилишини тезлаштириши кутилмоқда.