Профессионал бокс. Жаҳонгир Зокиров биринчи раунддаёқ рақибини нокаутга учратди

Саудия Арабистони пойтахти Ар-Риёд шаҳрида Zuffa Boxing ташкилоти томонидан профессионал бокс турнири ўтказилмоқда.

Унда иштирок этаётган оғир вазн тоифасидаги ўзбекистонлик боскчи Жаҳонгир Зокиров профессионал рингдаги учинчи жангини ҳам ғалаба билан якунлади.

У канадалик Брендон Колантаниони (8-2, 1 КО) биринчи раунддаёқ нокаутга учратди. Шу тариқа Зокиров профессионал боксдаги ғалабали сериясини давом эттирди.

23 ёшли Зокиров ҳаваскор боксда ҳам муваффақиятли ҳаракат қилмоқда. У Осиё ва Жаҳон чемпионати, шунингдек, 2026 йилги Осиё ўйинларида кумуш медални қўлга киритган.

Маълумот учун, Zuffa Boxing UFC бош директори Дана Уайт ҳамда Саудия Арабистони Умумий кўнгилочар тадбирлар бошқармаси раиси Турки ал аш-Шайх томонидан ташкил этилган профессионал бокс промоушени ҳисобланади. Компания қароргоҳи Лас-Вегас шаҳрида жойлашган.

2017 йил август ойида MMA жангчиси Конор Макгрегор ва боксчи Флойд Мейвезер ўртасидаги шов-шувли жангдан сўнг Дана Уайт профессионал бокс бозорига Zuffa Boxing бренди остида кириш ниятини эълон қилган эди.

Уайт ўша пайтда профессионал бокс тизимини “пароканда ва самарасиз” деб баҳолаб, UFC моделига ўхшаш марказлашган, промоутерликка асосланган бошқарув тизимини жорий этишни мақсад қилганини билдирган. Шунга қарамай, кенг медиа эътибор ва бренд маҳсулотлари савдосига қарамасдан, лойиҳа бир неча бор кечиктирилган.

2025 йил 18 июнь куни Дана Уайт расмий равишда UFC’нинг бош компанияси — ТКО Group Holdings профессионал бокс саноатига Зуффа Boxing номи остида киришини эълон қилди. Шу тариқа 2017 йилда илк бор тилга олинган бренд расман қайта тикланди. Баёнот Спорц Business Жоурнал нашрига берилган интервью орқали оммага маълум қилинди. Унда Уайт Зуффа Boxing профессионал боксда UFC моделини татбиқ этишини таъкидлаган.

Промоушен ўзининг илк турнирини 2025 йил 13 сентябрь куни ўтказди. Ушбу тарихий оқшомда Сауль Алварес ҳамда Теренс Кроуфорд супер ўрта вазн тоифасида мутлақ жаҳон чемпионлиги учун рингга кўтарилди. Бироқ ушбу жангда Zuffa Boxing ҳам Riyadh Season каби, анъанавий моделдаги чемпионлик баҳсининг асосий ташкилотчиларидан бири сифатида иштирок этган.