Юнон-рум кураши: Осиё чемпионатида ҳозирча 2 та олтин, 2 та кумуш медаль қўлга киритдик

Қирғизистоннинг Бишкек шаҳрида ўтказилаётган ўсмирлар (U 17) ва ёшлар (U 23) ўртасидаги Осиё чемпионатининг кечаги беллашувларида иштирок этган 4 нафар юнон-рум курашчимизнинг барчаси медалларга эга чиқишди.

— 60 кг вазндаги юнон-рум курашчимиз Шермуҳаммад Шарибжонов олтин медаль учун кечган баҳсда қирғизистонлик Нурмуҳаммет Абдуллаевни 9-0 ҳисобида доғда қолдирди.

— 67 кг вазн тоифасида юртимиз шарафини ҳимоя қилаётган Аброр Атабаев эса финал баҳсида қирғизистонлик Азамат Саматни 10-0 ҳисобида доғда қолдирди ва Ўзбекистон терма жамоасига иккинчи олтин медални тақдим этди.

— 72 кг вазнда юртимиз шарафини ҳимоя қилган Жаҳонгир Ҳамроев Осиё чемпионатининг кумуш медалига сазовор бўлди. Ҳамюртимиз Осиё чемпионлиги учун кечган муросасиз баҳсда қирғизистонлик Адилхан Нурланбековга 2-4 ҳисобида ютқазиб қўйди.

— 77 кг вазнда юртимиз шарафини ҳимоя қилган Дилшод Омонгелдиев финал учрашувида қирғизистонлик Акилбек Талантбековга имкониятни бой бериб, у ҳам Осиё чемпионатининг кумуш медалига сазовор бўлди.

Шу тариқа, юнон-рум курашчиларимиз Осиё чемпионатидаги биринчи кунги беллашувларини 2 тадан олтин ва кумуш медали билан якунлашди.

Манба: minsport.uz