Тошкентдаги бир нечта "дом"ларда ертўлалар бузилиб, таянч деворлар олиб ташлангани аниқланди — фото

Бу биноларда яшовчи фуқаролар ҳаётини хавф остига қўйган ҳуқуқбузарлар билан профилактик суҳбат ўтказилди. 15 кун ичида ҳуқуқбузарликларнинг олди олинмаса, улар жавобгарликка тортилади.

Қурилиш ва уй-жой коммунал хўжалиги вазирлигининг маълум қилишича, пойтахтнинг Яшнобод тумани Тузел — 2 мавзеси «Ватандош» МФЙдаги 9 қаватдан иборат 12-б уйда яшовчи аҳоли мурожаатларига асосан ўрганиш ишлари олиб борилди.

Аниқланишича, бинонинг ертўла қисмида тадбиркорлар томонидан ноқонуний ишлар амалга ошириб келинмоқда. Бинонинг ертўласи бузилиб ётгани, ҳатто бино фундаменти ўзгартирилаётгани аниқланди.

Шунингдек, Шайхонтоҳур тумани «Лабзак» даҳаси 1-а уйда текширув ўтказилган. Аниқланишича, бинонинг ертўласи тегишли талабларни бузган ҳолда ўзгартирилган. Фуқаро лойиҳа ҳужжатларидан четга чиққан ҳолда бинонинг таянч деворлари ҳамда коммуникация тармоқлари жойлашувини ўзгартирган.

Яккасарой тумани Себзор кўчаси «Дилбулоқ» маҳалласида жойлашган 1-сонли уйда ҳам қонунбузилиш ҳолатлари аниқланди.

9 қаватли мазкур уйнинг биринчи қаватида истиқомат қилувчи мулкдор умумфойдаланишдаги ертўлага кириш учун уйнинг ичидан плита деворларини бузган ҳолда зинапоя ўрнатганлиги маълум бўлди. Кўп қаватли уйнинг ички ва ертўла қисмида ўзбошимчалик билан таянч ва таянч бўлмаган деворлар тамомила олиб ташланган. Шунингдек, уйдаги дераза-ромларнинг пастки қисмидаги таянч деворлар ҳам бузилган ва устунли соябон (навес) ўрнатилган.

Инспекция томонидан ҳуқуқбузарларга нисбатан тегишли тартибда маъмурий баённома расмийлаштирилиб, 15 кун муддатда бинони ўз ҳолига қайтариш бўйича топшириқ берилди.