Блогер Фарход Маннопов вафоти юзасидан прокуратура текширув бошлади

Ижтимоий тармоқда тарқалган марҳумни операция қилган шифокорлар ҳибсга олингани ҳақидаги хабар рад этилди.

Фарход Маннопов (Mittivine) ўтказилган жаррохлик амалиётидан кейин вафот этганлиги ҳолати юзасидан Чилонзор тумани прокуратураси томонидан терговга қадар текширув ҳаракатлари олиб борилмоқда. Бу ҳақда Бош прокуратура матбуот котиби Ҳаёт Шамсутдинов хабар берди.

Текширув доирасида шифокорларнинг хатти-ҳаракатлари бўйича хизмат текшируви тайинланган.

Шунингдек, қўшимча қилинишича, Ф.Манноповнинг вафот этганлиги ҳолати юзасидан жиноят иши қўзғатилганлиги, иш доирасида шифокорлар ушлангани ёки қамоққа олинганлиги ҳақида тарқалаётган хабарлар асоссиз ва ҳақиқатга тўғри келмайди.