9 баллгача зилзила кузатилиши мумкин бўлган ҳудудлар рўйхати вазирлик томонидан эълон қилинмаган — ФВВ

Вазирлик зилзилага оид тарқалган хабарлар ёлғон эканлиги бўйича огоҳлантириш билан чиқди.

Бугун, ижтимоий тармоқларда яна бир бор зилзила рўй бериши мумкинлиги ҳақида ёлғон маълумотлар тарқалиб, унинг манбаси сифатида Фавқулодда вазиятлар вазирлиги расмий веб-сайти кўрсатилган эди.

ФВВ матбуот хизматининг маълум қилишича, «7-9 балли зилзила рўй бериши мумкин бўлган ҳудудлар рўйхати» ФВВ томонидан эълон қилинмаган.

Вазирлик аҳолини саросимага тушмасликка ва ёлғон хабарларга ишонмасликка чақирди.

«Бугунги кунда зилзиланинг вақти ва жойини аниқ белгилаб берувчи технология йўқлигини эслатиб ўтамиз»,- дейилади хабарда.