Тошкент аэропортида учиш-қўниш йўлагини капитал реконструкция қилиш якунланди — фото
Аэропортнинг иккинчи учиш-қўниш йўлаги янгиланди, у охирги марта 26 йил аввал реконструкция қилинган. Уни реконструкция қилиш лойиҳаси 120 миллиард сўмга баҳоланмоқда.
12 апрелдан бошлаб узунлиги 3905 метр ва кенглиги 60 метр бўлган, барча турдаги самолётларни қабул қиладиган учиш-қўниш йўлаги фойдаланишга топширилди. Йўлак PCN кўрсаткичлари: йўлак чидамлилиги таснифи рақами 69, текислиги — 5. Бу эса 285 тоннагача юкларга бардош бериш имконини беради.
Шунингдек, учиш-қўниш йўлаги ICAO'нинг биринчи тоифасига мос келадиган замонавий энергия тежовчи ёритиш ускуналари ва қўниш тизимига эга. Бу эса горизонталь кўриниш 800 метр ва вертикал кўриниши 60 метр бўлганда ҳам самолётга қўниш имконини беради.
«Бугун биз янгиланган иккинчи учиш-қўниш йўлагини очмоқдамиз. Йўлак охирги марта 1996 йилда реконструкция қилинганини ҳисобга олсак, бу Тошкент аэропорти учун жуда муҳим воқеа. Учиш-қўниш йўлагининг ҳолати эса парвозлар хавфсизлигини таъминлашнинг муҳим мезони ҳисобланади. Бундан ташқари, парвозлар сони ҳар йили тахминан 50% га ошмоқда. Ҳозир пойтахт ҳаво бандаргоҳида кунига ўртача 140 та рейс амалга оширилмоқда. Тошкент эса «ҳаб» — марказга айланиб бормоқда. Шу боис, ўтган ёзда капитал реконструкция қилиш учун учиш-қўниш йўлагини ёпишга қарор қилинган эди», — дея изоҳ берди Uzbekistan Airports бошқаруви раиси Раъно Жўраева.
Реконструкция лойиҳаси 120 миллиард сўмга баҳоланмоқда. Йўлакни реконструкция қилиш лойиҳаси Development infrastructure and design томонидан ишлаб чиқилган. Ишлар эса Dorkompleksnab Plus МЧЖ пудратчи томонидан амалга оширилди.
