Наманганда ИИБ ходимлари икки фуқарони қўлига кишан тақиб, олиб кетишди — видео

Вилоят ИИБ ходимлар нега бундай қилишганига изоҳ берди.

Аввалроқ, ижтимоий тармоқда Наманганда ИИБ ходимлари икки нафар фуқаронинг қўлига кишан тақиб, олиб кетишаётгани акс этган видео тарқалди. Вилоят ИИБ ҳолат юзасидан маълумот берди.

Аниқланишича, 27 май куни соат 00:10 да тунги хизматга жалб қилинган Учқўрғон тумани ИИБ профилактика инспекторлари тумандаги «Саноат» МФЙ Чинор кўчасида жойлашган компьютер ўйинхонасини олдидан ўтиб кетишаётган вақтда, ушбу жойда 10 нафардан ошиқроқ фуқаролардан 2 нафари жамоат тартибини ҳамда фуқаролар тинчлигини бузиб, жанжал кўтараётганларига гувоҳ бўлишган.

Ходимлар томонидан йигитларни тартибга чақириш мақсадида мурожаат қилинганида, 1998 йилда туғилган икки йигит — Б.И. ва Т.Т.лар ИИБ ходимларини қонуний талабларини бажармай, фаол қаршилик кўрсатиб, ҳуқуқбузарликларини давом эттиришган.

Шу сабабли йигитлар қонуний тартибда туман ИИБга олиб келиниб, уларга нисбатан МЖтКнинг 183-моддаси (майда безорилик) ва 194-моддаси (ички ишлар органи ходимнинг қонуний талабини бажармаслик) билан тегишли ҳужжатлар расмийлаштирилган.

Ҳозирда мазкур ҳолат юзасидан Учқўрғон тумани ИИБ томонидан терговга қадар текширув олиб борилмоқда.