"Ҳаж-2023” мавсумининг илк зиёратчилари Саудия Арабистонига жўнаб кетишди — фото

Бортига 240 нафар зиёратчини олган самолёт Тошкентдан Мадинага учиб кетди.

3 июндан 4 июнга ўтар кечаси маҳаллий вақт билан соат 02:00 да Uzbekistan Airways миллий авиакомпаниясининг бортида 240 нафар зиёратчиси бўлган илк рейси Тошкентдан Мадинага (Саудия Арабистони) учиб кетишди. Бу ҳақда Uzbekistan Airports Матбуот хизмати хабар берди.

"Бўлғуси ҳожиларнинг дастлабки гуруҳини кузатиш учун Президент маслаҳатчиси, Дин ишлари бўйича қўмита ва Ўзбекистон мусулмонлари идораси раҳбарияти, таниқли уламолар, имом-домлалар, мутасаддилар ва ОАВ вакиллари Тошкент халқаро аэропортида жам бўлишди, - дейилади Ўзбекистон мусулмонлари идораси хабарида.

Эслатиб ўтамиз, 4-19 июнь кунлари Ўзбекистоннинг 10 та шаҳридан Мадинага парвозлар амалга оширилади. Бу йил энг кўп зиёратчилар Тошкентдан Ҳажга боради — 16 рейсда 5575 нафар йўловчи ташилади. Намангандан 14 та, Фарғонадан 6 та, Самарқанддан 4 та, Бухоро, Урганч, Қарши ва Термиздан 3 тадан рейс, шунингдек, зиёратчилар билан 2 та рейс Навоийдан, Нукусдан эса 1 та рейс амалга оширилади.

Қайд этилишича, Ўзбекистондан жами 15130 нафар зиёратчи Ҳаж зиёратини адо этади.