Ўзбекистон биринчи президентининг ўғли Татьяна Каримовани мерос ҳуқуқи учун судга берди

Ўзбекистоннинг биринчи президенти Ислом Каримов оиласида мерос бўйича низо бошланди. Унинг беваси Татьяна Каримовани ўгай ўғли Пётр Каримов судга берди.

Биринчи инстанция судининг мажлиси жорий йил 26 июнь куни соат 10:00 га Фуқаролик ишлари бўйича Яккасарой туманлараро судида бўлиб ўтади. Бу ҳақда Ўзбекистон Олий судининг очиқ маълумотлари маълум қилмоқда.

Хабар қилинишича, суд иши мерос ҳуқуқидан келиб чиқадиган низоларга тегишли.

Пётр Каримов Ислом Каримовнинг 2008 йилда Тошкентда вафот этган Наталья Кучма билан биринчи турмушидан тўнғич ўғли. Сўнгги маълумотларга кўра, Пётр шу вақт давомида Москва вилоятида яшаган.