Тошкент ҳокимлиги пора билан қўлга тушган раҳбар ҳақидаги хабарни рад этди
Аввалроқ, Eltuz Telegram-каналида пойтахт ҳокимлиги қурилиш бошқармаси бошлиғи ҳибсга олингани ҳақида маълумот эълон қилинган эди.
Ушбу хабарга Тошкент шаҳар ҳокимлиги муносабат билдирди.
Маълум қилинишича, Лутфулла Алманов Тошкент шаҳар ҳокимлигида эмас, балки Учтепа туман ҳокимлигида туман ҳокимининг уй-жой, коммунал хизмат кўрсатиш ва ободонлаштириш масалалари бўйича ўринбосари лавозимида 2019 йилнинг 27 июнидан 2021 йил 24 ноябрь кунига қадар ишлаган. Яъни, Тошкент шаҳар ҳокимлигида умуман ишламаган ва бундан қарийб икки йил олдин, мувофиқ буйруқ билан ҳокимлик тизимидан бўшаб кетган.
«Шу сабабли, Eltuz каналининг мазкур мақоласида келтирилган Тошкент шаҳар ҳокимлиги ва ҳоким в.б. Шавкат Умурзоқовга тегишли бўлган барча иддаолари ёлғон ва ҳақиқатга тўғри келмайди», — дейилади хабарда.