Қозоғистон ва Ўзбекистонни боғловчи янги темирйўл линияси қурилиши бошланди

Таъкидланишича, жами 152 км узунликдаги ушбу темирйўл ҳудудларнинг ривожланишига таъсир қилади.

Қозоғистон бош вазири Aлихан Смаиловнинг хабар беришича, Қозоғистон президенти Қосим-Жўмарт Тўқаев топшириғи билан республиканинг транспорт-транзит салоҳиятини янада ривожлантиришга қаратилган йирик инфратузилма лойиҳаси амалга оширилмоқда. Унинг доирасида Қозоғистон-Ўзбекистон давлат чегараси орқали янги назорат-ўтказиш пункти очилади.

Маълум қилинишича, жорий йилдан буён Қозоғистон ва Ўзбекистон ўртасида юк ташиш ҳажми 25,8 млн тоннани ташкил этди. Aсосий юк оқими бугунги кунда Сариоғоч давлатлараро станцияси орқали ўтади.

Янги темирйўл линиясининг қурилиши мавжуд Сариоғоч-Тошкент участкасидан юкларни янги линияга йўналтириш, Сариоғоч станцияси фаолиятини енгиллаштириш ва бутун Ўзбекистон йўналиши бўйича экспорт ташиш ҳажмини ошириш имконини беради. Бундан ташқари, лойиҳа Туркистон вилоятини республиканинг асосий темирйўл тармоғига улаш орқали унинг ривожланишига ҳисса қўшади.

“Темирйўллар давлатимизнинг иқтисодий ва ижтимоий соҳалари тараққиётини таъминловчи стабил артериядир. Ўтган йили Қозоғистон мустақиллигининг 30 йиллигидаги максимал юк ташиш ҳажми 245 млрд тонна-километрни ташкил этди. Бу йил ҳам юқори кўрсаткичлар давом этмоқда”, — дея таъкидлади Aлихон Смоилов.

Қозоғистон жорий йил охирига қадар Ўзбекистон билан юк ташиш ҳажмини қарийб 31 млн тоннага етказишни режалаштирган бўлиб, бу ўтган йилга нисбатан 16 фоизга юқори.

Лойиҳа икки босқичга бўлинган.

Биринчиси, Сирдарё станциясига чиқадиган Ўзбекистон давлат чегараси бўлган Йердаут-Мақтаорал линиясини қуришни назарда тутади.

Иккинчи босқичда шу станцияга чиқиш имконияти бўлган Ўзбекистон давлат чегараси – Еттисой қисми фойдаланишга топширилади.

Жами 152 км узунликдаги темирйўл қурилади. Лойиҳани амалга ошириш учун 19,7 минг тонна рельс, шунингдек, 280 минг дона темир-бетон шпал ва рельсли маҳкамлагичлар харид қилиш режалаштирилган.

Янги темирйўл линиясининг қурилиши 3 400 иш ўрни яратиш имконини беради. Лойиҳада Қозоғистон таркибининг улуши 85 фоизни ташкил этади.

Тўққизта станция қурилади. Темирйўл Қозоғистондан ушбу ҳудудларга ва бу ҳудудлардан Қозоғистонга тўғридан-тўғри юк ташиш имконини беради. Чунки энди улар Ўзбекистон чегарасини кесиб ўтишга мажбур. Бу ҳудудларнинг ривожланишига таъсир қилади.

Aлмагамбетовнинг сўзларига кўра, Қозоғистоннинг транзит салоҳияти ҳам сезиларли даражада ошади.

“Aфғонистон, Эрон, Тожикистон ва Ўзбекистонга кетаётган юклар бу линия орқали тезроқ ўтади. Яна бир таъсир: Сариоғоч-Тошкент участкасида юкланиш пасаяди. Сўнгги йилларда у ерда жуда кўп юк бор эди. Бироқ, уларнинг ҳаммаси ҳам ўз вақтида етказилмайди, чунки у бундай юк оқимига мўлжалланмаган. Охирги икки-уч йил ичида у кескин ошди. Қурилиш ушбу асосий участкадаги тирбандликни бартараф этишга ва йўловчи поездларининг ҳаракатланишига ёрдам беради”, — деди Канат Aлмагамбетов.