Жиззахда катта солиқ инспектори фирибгарликда айбланиб қўлга олинди

Жиззахда тадбиркорга имтиёзли кредит олишда кўмак беришни ваъда қилган катта солиқ инспектори ушланган. Бу ҳақда мухбиримиз хабар бермоқда.

Солиқ ходими 200 миллион сўмлик кредит олишда ёрдам бериш учун 600 доллар талаб қилган. У мазкур “ёрдам”ни банк соҳасида ишлайдиган танишлари ёрдамида ташкил қилишини айтган.

Мансабдор шахс аванс сифатида 200 доллар олаётганда қўлга олинган.

Ушбу ҳолат бўйича Жиноят кодексининг 168 (фирибгарлик) ва 211 (пора бериш) моддалари бўйича жиноий иш очилган. Тергов ҳаракатлари олиб борилмоқда.