Президентга Тошкент қиёфасини яхшилашга қаратилган «Ечимлар атласи» тақдим этилди
Мувозанатли ривожлантириш мақсадида Тошкент шаҳрининг 2045 йилгача бўлган бош режаси тасдиқланди, унда шаҳарнинг қурилиш режалари, муҳандислик ва йўл-транспорт инфратузилмаси, муҳофаза ҳудудлари бўйича асосий кўрсаткичлар белгиланган.
Қайд этилишича, «Ечимлар атласи» ушбу режанинг мантиқий давоми ҳисобланади. У объектларнинг ташқи кўриниши ва шаҳарнинг жамоат муҳити учун умумий талабларни белгилайди ва шаҳар объектларини лойиҳалаш, ўрнатиш ва улардан фойдаланиш қоидаларини ўз ичига олган бешта жилддан иборат. Ҳужжатда жамоат жойларини ободонлаштириш, бинолар фасадини ягона меъморий қиёфага келтириш бўйича тавсиялар ўрин олган.
Масалан, ҳозирги стандарт бўйича йўлларни қуриш ва таъмирлаш қатнов қисмининг «қизил чизиғи»гача бажарилаётган бўлса, ривожланган шаҳарлар тажрибасида бу кўчанинг икки тарафидаги бинодан биногача тамойилида амалга оширилади — шунда оралиқда қаровсиз жой қолмай, йўл бўйи яхлит ва мутаносиб ободонлаштирилади, дейилади хабарда.
«Ечимлар атласи» барқарор ривожланиш мақсадларини илгари суриш, миллий ранг-барангликни жорий этиш ҳамда экологик тоза ва қулай шаҳар маконларини шакллантиришга қаратилган. Унинг ишлатилиши янги ривожлантириш лойиҳаларида хатолардан қочишга ёрдам бериши керак.
Тақдимотда «Атлас»нинг асосий талаблари ва амалга оширилиши лозим бўлган вазифалар муҳокама қилинди. Давлат раҳбари шаҳарнинг ўзига хослигини сақлаган ҳолда қиёфасини янада яхшилаш, йўл бўйларини ободонлаштириш, турмуш маданиятини ошириш бўйича кўрсатмалар берди.