World Boxing ташкилоти янгиланган рейтингини эълон қилди: Ўзбекистон биринчи ўринда

World Boxing халқаро ташкилоти ўзининг янгиланган расмий рейтингини эълон қилди. Ҳисоб-китобларга кўра, Ўзбекистон терма жамоаси умумий натижалар бўйича биринчи ўринни эгаллаган, Қозоғистон эса иккинчи поғонадан жой олди.

Ўзбекистонлик олти нафар боксчи ўз вазнида пешқадамлик қилмоқда: Абдумалик Ҳалоков (60 кг), Асадхўжа Мўйдинхўжаев (65 кг), Фазлиддин Эркинбоев (75 кг), Жаҳонгир Умматалиев (80 кг), Акмалжон Исроилов (85 кг) ва Тўрабек Ҳабибуллаев (90 кг).

Қолган тўрт вазн тоифасида эса Санжар Тошкенбай (50 кг), Маҳмуд Собирхан (55 кг), Тўрахан Собирхан (70 кг) ва Айбек Оралбай (+90 кг) каби қозоғистонлик чарм қўлқоп усталари етакчилик қилмоқда.

“Рейтингда Ўзбекистон боксчилари 10 та вазн тоифасининг 6 тасида етакчилик қилди, Қозоғистон эса қолган 4 тоифада пешқадам бўлди”, дейилади ташкилотнинг расмий Instagram саҳифасида.

Эслатиб ўтамиз, Ливерпульда ўтган World Boxing жаҳон чемпионатида Қозоғистон 7 та олтин медал билан умумжамоа ҳисобида биринчи поғонадан жой олган эди, Ўзбекистон эса 6 та олтин билан иккинчи ўринни эгаллаганди.

Манба: daryo.uz