Африкалик боксчи: «Агар Аҳмадалиев жангга тайёр бўлмаса, нега чемпионга чақирув ташлади?»

14 сентябрь куни Нагоя (Япония) шаҳрида Наоя Иноуэ (31-0, 27 KO) иккинчи енгил вазн тоифасидаги (55,3 кг гача) мутлақ чемпионлик унвонини муваффақиятли ҳимоя қилди. У ўзбекистонлик собиқ чемпион Муроджон Аҳмадалиевни (14-2, 11 KO) ишончли равишда мағлуб этди.

Ушбу вазн тоифасида жанг қилаётган, «Энергия» лақаби билан танилган 29 ёшли намибиялик Филлипус Нгхитумбва (17-2, 15 KO), Нагояда ўтказилган жангдан қониқмади. У The Ring нашрига берган интервьюсида ҳар икки боксчини ҳам танқид қилиб, уларни енгишга қодир эканини билдирди.

«Бу жанг жуда ҳам ноумид этди. У зерикарли ўтди, ҳеч қандай ҳаракат йўқ эди. Бу даражада бизга зерикарли жанглар керак эмас. Агар Аҳмадалиев жангга тайёр бўлмаса, нега чемпионга чақирув ташлади? Мен иккаласини ҳам бир кечада нокаут қиламан.

Иноуэ доим таъсирли чиқиш қилади, аммо бу сафар у жуда ҳам оддий ва чекланган эди. Балки шунинг учун ҳам уни охирги жангда нокдаунга туширишди? Мен у билан жанг санаси ҳақида қўнғироқ кутяпман. Шунда бутун дунёга иккинчи енгил вазн тоифасида энг кучли боксчи эканимни кўрсатаман», — деди африкалик.

Манба: sports.kz