Давактив директори ишдан олинди, президент агентлик ва «Ўзбекнефтгаз»да миллиардлаб талон-торож аниқланганини айтди
Давлат раҳбарининг айтишича, Давлат активларини бошқариш агентлигининг мансабдор шахслари бозор қиймати камида 250 миллиард сўмлик ер участкасини ёпиқ аукционга чиқариб, 120 миллиард сўмга сотиб юборган.
Шу боис, 26 январь куни агентлик директори Акмалхон Ортиқов ишдан олинган.
«Ҳақли савол туғилади. Ушбу идораларда йиллар давомида коррупция авж олган бўлса, хавфсизлик масалалари учун масъуллар қаерга қараган?» — деди президент.
Шавкат Мирзиёев ДХХ раисига «Ўзбекнефтгаз» ва Давлат активларини бошқариш агентлиги учун масъул ходимларининг жавобгарлигини кўриб чиқишни топширди.
Комплаенс хизмати, Давлат хавфсизлик хизматига Давлат активлари агентлигининг мансабдорларига қўзғатилган жиноят иши тергов гуруҳига Хавфсизлик хизматининг иқтисодий масалаларга масъул тузилмаларидан ҳам мутахассисларни жалб қилиш топширилди.
«Сотилган давлат мулклари бўйича ҳар бир ҳолатни синчковлик билан текшириб, барча коррупсиявий схемаларни фош қилсин ва жазо муқаррарлигини таъминласин. Билиб қўйинглар, давлатнинг ҳар бир сўми бўйича таъсирчан назорат ўрнатилади. Жавобгарлик муқаррар, жазо қаттиқ бўлади!», — деди президент.
Эслатиб ўтамиз, декабрда илгари «Ўзбекгидроэнерго»ни бошқарган Абдуғани Сангинов Ўзбекистоннинг энг йирик газ қазиб олувчи компанияси бўлган «Ўзбекнефтгаз» бошқаруви раиси этиб тайинланганди. У Баҳодир Сидиқовнинг ўрнини эгаллади.
Кейинроқ Сангинов «йил давомида содир этилган жиддий қоидабузарликлар учун» Термиз, Жиззах, Мароканд, Кучлик нефть базалари раҳбарларини ишдан бўшатди.
Инвесторлар томонидан геологик қидирув ишларининг суст олиб борилаётгани туфайли «Ўзбекнефтгаз» мамлакатнинг учта минтақасидаги инвестиция блокларини қайта хатловдан ўтказишга қарор қилди. Компания, шунингдек, ўз мажбуриятларини бажармаётган хусусий газ қазиб олиш операторларининг фаолиятини кўриб чиқиш ва рақобатбардош савдолар жараёни орқали янгиларини жалб қилишни режалаштирмоқда.
Gazeta Ўзбекистонда шаффоф бўлмаган хусусийлаштириш ҳолатлари ҳақида бир неча бор хабар берган, йирик активлар жамоатчилик муҳокамасисиз ёки очиқ савдоларсиз янги эгаларига ўтказилаётганини ёзганди. Аввалроқ, «Қизилқумцемент», UNG Petro ёқилғи қуйиш шохобчалари тармоғи, Чиноз нефтни қайта ишлаш заводи, Ангрен шина заводи, Фарғона нефтни қайта ишлаш заводи, Perfectum мобиль оператори, Узагроэкспортбанк, Uzcard, Деҳқонобод калий заводи ва бошқа компаниялар билан боғлиқ битимлар шаффофлик борасида саволлар уйғотганди.