US Open турнирининг умумий мукофот жамғармаси рекорд даражага етди
Турнир ташкилотчиларининг маълум қилишича, мукофот жамғармаси 2024-йилга нисбатан 44 фоизга ошган. Эркаклар ва аёллар ўртасидаги яккалик баҳсларида ғолиб чиққан теннисчиларнинг ҳар бири 5,5 миллион доллардан мукофот олади. Бу теннис тарихидаги энг юқори чемпионлик мукофотидир.
Асосий тўрнинг биринчи босқичида мағлуб бўлган теннисчилар эса 140 минг доллардан ишлаб олади. Бу ҳам “Катта дубулға” турнирлари тарихидаги энг юқори биринчи босқич мукофоти ҳисобланади.
Бундан ташқари, АҚШ теннис ассоциацияси теннисчиларни қўллаб-қувватлашга қаратилган янги дастур учун 2 миллион доллар ажратади. Мазкур маблағ эркак ва аёл теннисчилар ўртасида тенг тақсимланади.
Мукофот пулларининг оширилиши теннисчилар томонидан ижобий кутиб олинди. Аввалроқ спортчилар “Катта дубулға” турнирларидан олинадиган даромаднинг каттароқ қисмини талаб қилиб, норозилик акцияларини ўтказишни режалаштирганди. Мукофот жамғармаси оширилганидан сўнг теннисчилар бу йилги US Openда норозилик намойиши ўтказмасликка қарор қилди.
Шу билан бирга, теннисчилар мукофот пулларининг оширилиши билан чекланиб қолмоқчи эмас. Улар барча “Катта дубулға” турнирларида мусобақалардан олинадиган даромадни теннисчилар ўртасида тақсимлашнинг ягона тизимини жорий этишни талаб қилмоқда.
Шунингдек, Австралия очиқ чемпионати, “Ролан Гаррос”, “Уимблдон” ва US Open ташкилотчилари теннисчилар манфаатларини ҳимоя қилиш ва уларнинг фикрларини инобатга олиш мақсадида Grand Slam Player Advisory Council — “Катта дубулға” теннисчилар маслаҳат кенгашини тузди. Кенгаш 2026-йилги УС Опен якунланганидан сўнг фаолиятини бошлайди.
Маълумот учун, 2026-йилги US Open АҚШнинг Нью Йорк шаҳрида 30-августдан 13-сентябргача бўлиб ўтади. Турнирнинг амалдаги чемпиони испаниялик Карлос Алкарас ҳисобланади.