Ислом Махачев UFCдаги фаолияти давомида қанча маблағ ишлаб топган?

Доғистонлик ММА жангчиси Ислом Махачев 15-август, шанба куни ирландиялик Ян Геррини мағлубиятга учратиб, UFCнинг ярим ўрта вазн тоифасидаги чемпионлик камарини ҳимоя қилган эди. 34 ёшли спортчи учун бу ушбу вазндаги иккинчи жанг бўлди (у камарни Жек Делла Маддаленага қарши баҳсда қўлга киритганди).

UFC тарихида икки хил вазн тоифасида чемпион бўлган илк россиялик жангчи саналган Махачев ушбу ғалабаси билан яна бир ўзига хос натижа қайд этди — у кетма-кет 17 та жангда зафар қучиб, афсонавий Андерсон Силванинг кўп йиллик рекордини (16 та жанг) янгилади. Хўш, ушбу тарихий натижалар ортидан спортчи қанча маблағ ишлаб топди?

Фаолият давомидаги умумий даромад

Give me Sport ва Маrca нашрлари таҳлилига кўра, Исломнинг фаолияти давомида ишлаб топган умумий даромади қарийб 17,5 миллион долларни ташкил этади. Барча тўловлар, гонорар ва пуллик трансляциялардан (PPV) тушган бонусларни қўшиб ҳисоблаганда, у бугунги кунда UFC тарихидаги энг кўп даромад топган 10 та жангчи қаторига кирган (бу борада пешқадам 39,3 млн доллар билан Конор Макгрегор ҳисобланади). 2025-йил ҳолатига кўра Махачевнинг соф бойлиги 5–7 миллион доллар атрофида баҳоланмоқда.

Махачевнинг даромадлари айниқса сўнгги йилларда, чемпионлик мақомига эришгач кескин ошди. Sporty Salaries нашрининг хабар беришича, Ян Герри билан сўнгги жанг учун унинг кафолатланган гонорари 1 миллион долларни ташкил этган. PPV фоизлари ва бонуслар ҳисобига бу сумма 3 миллион доллардан ошади.

Бунга қадар у ярим ўрта вазнда Жек Делла Маддаленага қарши кечган баҳсда 3,32 миллион доллар (800 минг кафолатланган, 2,5 млн PPV ва 32 минг ҳомийлик пуллари) ишлаб топганди.

Фаолиятидаги энг йирик гонорарни эса 2025-йилнинг январ ойида қўлга киритган. Ўшанда у жароҳат олган Арман Сарукяннинг ўрнига октагонга чиққан бразилиялик Ренато Мойканони мағлуб этиб, 3,64 миллион доллар даромад кўрган.

Манба: www.daryo.uz