Наркотик истеъмолчилари бу учун ойига 20−25 млн сўм сарфлаяпти — президент

Ўтган йили Тошкентда гиёҳвандликка ружу қўйган 1500 дан ортиқ одам расман рўйхатга олинган. Бироқ қайд этилмаган гиёҳвандлар сони бундан ҳам кўпроқ ва уларнинг аксарияти ёшлар. Бу ҳақда президент Шавкат Мирзиёев сешанба куни бўлиб ўтган йиғилишда маълум қилди.

Президентнинг сўзларига кўра, улар ойига ўртача 20−25 миллион сўмни гиёҳванд моддаларга сарфлайди ва уларнинг пул излаб жиноят содир этиши ажабланарли эмас. Унинг қўшимча қилишича, ўтган йили мамлакат бўйлаб 64 киши наркотик билан боғлиқ жиноятларни содир этган, ҳар уч ҳолатдан бири Тошкентда содир бўлган.

Гиёҳвандликка нисбатан тоқатсизликни ривожлантириш

Давлат раҳбари гиёҳвандликка нисбатан тоқатсизлик муҳитини шакллантириш мақсадида Ёшлар ишлари агентлиги, Мактабгача таълим вазирлиги ҳамда Олий таълим, фан ва инновация вазирлигида алоҳида ўринбосар лавозими ташкил этилишини эълон қилди.

Бундан ташқари, ҳоким, университет ректори, техникумлар ва мактаблар директорлари ўринбосарларидан бири ушбу соҳа учун масъул этиб тайинланади.

Президент гиёҳвандликни даволаш камида тўрт ой давом этишини таъкидлади ва давлат-хусусий шериклик асосида наркологик хизмат кўрсатиш бўйича ҳужжат лойиҳасини ишлаб чиқишни буюрди.

Бу йилдан бошлаб, шунингдек, нарко экспресс-тестлардан оммавий фойдаланишни бошлаш режалаштирилган.

Олий таълим, фан ва инновация вазири Конгратбай Шарипов, мактабгача ва мактаб таълими вазири Эъзозхон Каримова ва Ёшлар ишлари агентлиги директори Алишер Саъдуллаев. Фото: Президент матбуот хизмати.

Мусодара қилинган синтетик наркотик ҳажми 11 баравар ошди

Шавкат Мирзиёев сўнгги беш йил ичида Тошкентда мусодара қилинган синтетик гиёҳванд моддалар ҳажми 11 баравар ошганини маълум қилди. Ушбу наркотикларнинг 95 фоизи онлайн тарзда тарқатилади, тўловлар криптовалютада амалга оширилади. Мамлакат ичида нарколабораториялар очила бошлади.

Президент қонунчиликда давлат идораларининг бу соҳадаги вазифалари аниқ белгиланмаганини таъкидлади.

Шунингдек, у 1999 йилда қабул қилинган гиёҳванд моддалар тўғрисидаги қонуннинг янги таҳририни ишлаб чиқиш зарурлигини қайд этди.

Наркотикларни назорат қилиш агентлигига огоҳлантириш

Давлат раҳбари Наркотиклар ва ўқотар қуролларни назорат қилиш агентлиги фаолиятини танқид қилиб, улар амалда таҳлил ва халқаро ҳамкорлик билан чекланганини айтди.

Энди агентликнинг масъулияти кучайтирилади ва унга тегишли идоралар ишини мувофиқлаштириш, уларнинг фаолиятини мониторинг қилиш ва баҳолаш ваколати берилади. «Агентлик барча куч ва воситаларга эга бўлади», — дейилади президент матбуот хизмати хабарида.

Шавкат Мирзиёев агентлик раҳбари Равшан Маматовни агар унинг фаолиятида ўзгаришлар бўлмаса, ушбу лавозимга лойиқлиги қайта кўриб чиқилиши ҳақида огоҳлантирди.