Президент бир кун аввал огоҳлантирилган Наркотиклар назорати агентлиги директорини ишдан олди

Ўзбекистон президенти Шавкат Мирзиёев Равшан Мамажанович Маматовни Президент администрацияси ҳузуридаги Наркотиклар ва ўқотар қуролларни назорат қилиш агентлиги директори лавозимидан озод қилиш тўғрисидаги фармонни имзолади. Бу ҳақда чоршанба куни давлат раҳбари матбуот котиби Шерзод Асадов маълум қилди.

Бир кун олдин, жиноятчиликка қарши кураш бўйича йиғилишда президент агентлик фаолиятини танқид қилиб, улар амалда таҳлил ва халқаро ҳамкорлик билан чекланганини айтганди.

У Равшан Маматовни агар унинг фаолиятида ўзгаришлар бўлмаса, ушбу лавозимга лойиқлиги қайта кўриб чиқилиши ҳақида огоҳлантирганди.

Шавкат Мирзиёев агентликнинг масъулияти кучайтирилишини ва унга тегишли идоралар ишини мувофиқлаштириш, уларнинг фаолиятини мониторинг қилиш ва баҳолаш ваколати берилишини маълум қилди. «Агентлик барча куч ва воситаларга эга бўлади», — деб хабар берганди президент матбуот хизмати.

Йиғилишда ўтган йили Ўзбекистонда 64 киши наркотик таъсирида жиноят содир этгани, ҳар уч ҳолатдан биттаси Тошкентда содир бўлгани айтилди.

Сўнгги беш йил ичида пойтахтда мусодара қилинган синтетик гиёҳванд моддалар ҳажми 11 баравар ошган. Ушбу наркотикларнинг 95 фоизи онлайн тарзда тарқатилади, тўловлар криптовалютада амалга оширилади. Мамлакат ичида нарколабораториялар очила бошлаган.

Шавкат Мирзиёев наркожиноятчилик ва уюшган гуруҳларга қарши кураш бўйича наркоканалларнинг охирги манбаси ва ҳомийларигача етиб бориш учун масъулларда қатъият йўқлигини танқид қилди.

Унинг таъкидлашича, сўнгги уч ой ичида мамлакатда гиёҳванд моддалар савдоси билан шуғулланувчи 50 га яқин йирик гуруҳ аъзолари ҳибсга олинган ва ярим тонна наркотик мусодара қилинган.

Декабрь ойида гиёҳвандликка чалинган беморлар сони сўнгги беш йил ичида 53 фоизга ошгани хабар қилинганди. Синтетик наркотик истеъмол қилиши ортидан диспансер рўйхатига олинганлар тўрт баробарга ортган.

Ноябрь ойида Равшан Маматов Ўзбекистонда гиёҳванд моддалар билан боғлиқ жиноятлар сони беш йил ичида икки баравар кўпайганини хабар қилганди. Унинг таъкидлашича, ёшлар орасида «дорихона наркоманияси» кенг тарқалган.