Қозоғистон президенти Елена Рибакинани Aus Open чемпионлиги билан табриклади
“Сизни навбатдаги ажойиб ютуғингиз — Австралия очиқ чемпионатидаги ғалаба билан чин дилдан табриклайман. Сиз яна бир бор ўз мукаммал техникангиз ва ғалабага бўлган иродангизни кўрсатдингиз, натижага эришдингиз, бу эса бутун жаҳон теннис ҳамжамияти томонидан ҳайрат билан қабул қилинди — бу ютуқ Қозоғистон ва жаҳон теннис тарихи саҳифаларида ўчмас из қолдиради. Ушбу спортдаги муваффақият ва мамлакатимизда теннисни ривожлантириш ва тарғиб этиш йўлида қўшган беқиёс ҳиссангизни инобатга олиб, мен сизга 3-даражали “Барис” орденини тақдим этиш ҳақидаги Фармонни имзоладим. Сизга энг нуфузли турнирларда янада кўпроқ ютуқларни тилайман!” дейилади республика Президентининг табригида.
Маълумот учун, Мелбурн шаҳрида ўтказилган Австралия очиқ чемпионатининг финал учрашувида Қозоғистон вакили Елена Рибакина жаҳон рейтинги етакчиси, беларуслик Арина Сабаленкага қарши ғалаба қозонди.
Учрашув WTA рейтингида 5-рақам остида таснифланган Рибакина фойдасига 6:4, 4:6, 6:4 ҳисобида якунланди. Сабаленка жаҳоннинг биринчи рақамли аёл теннисчиси ҳисобланади. Шу тариқа Рибакина фаолиятида илк бор Australian Open чемпионига айланди. У 2023-йилда ҳам финалга чиққан, бироқ ҳал қилувчи баҳсда айнан Сабаленкага мағлуб бўлган эди.
Австралия очиқ чемпионати мавсумдаги илк “Катта дубулға” турнири бўлиб, қаттиқ қопламали майдонда ўтказилади. Турнирнинг умумий соврин жамғармаси қарийб 75 миллион АҚШ долларини ташкил этади. Аёллар ўртасидаги яккалик баҳсларида ғалаба қозонган Рибакина 2 миллион 770 минг АҚШ долларини қўлга киритди ҳамда ўз ҳисобига 2000 рейтинг очкосини қўшди.
Манба: daryo.uz