Шавкат Мирзиёев Тинчлик кенгашининг биринчи йиғилишида иштирок этиш учун Вашингтонга боради

Ўзбекистон президенти Шавкат Мирзиёев 19 февраль куни бўлиб ўтадиган Тинчлик кенгашининг биринчи йиғилишида иштирок этиш учун АҚШ пойтахт Вашингтон шаҳрига боради. Бу ҳақда «Таҳлилнома» кўрсатувида маълум қилинди.

Саммитдан кўзланган мақсад Ғазода ўт очишни тўхтатишнинг иккинчи босқичини илгари суриш ва уруш натижасида вайрон бўлган Фаластин ҳудудини тиклаш учун маблағ жалб қилишдан иборат, деб хабар берганди аввалроқ «Дунё» АА Axios'га таяниб.

Саммит ўтказилиши мумкин бўлган жой Доналд Трамп номидаги Тинчлик институти (собиқ United States Institute of Peace, USIP) деб аталган.

Тинчлик кенгаши низоми январь ойида Давосда бўлиб ўтган Жаҳон иқтисодий форумида имзоланган. Кенгашнинг дастлабки аъзолари Албания, Аргентина, Баҳрайн, Болгария, Венгрия, Ветнам, Миср, Индонезия, Қозоғистон, Қатар, Косово, Марокаш, Мўғулистон, БАА, Покистон, Парагвай, Саудия Арабистони, Туркия ва Ўзбекистон бўлди. Имзоловчилар орасида АҚШнинг Ғарбий Европадаги анъанавий иттифоқчилари йўқ эди.

Кенгаш Трампнинг ўзи томонидан бошқарилади, унинг куёви Жаред Кушнер ва АҚШ давлат котиби Марко Рубио махсус вакил Стив Уиткофф, Буюк Британиянинг собиқ бош вазири Тони Блер, Жаҳон банки гуруҳи президенти Ажай Банга, миллий хавфсизлик бўйича маслаҳатчи Роберт Габриэл ва Марк Роуэн, шунингдек, Американинг энг йирик хусусий инвестиция компанияларидан бири Apollo Global Management бош директори билан бирга «Ижроия кенгаши» таркибига киради.

Тинчлик кенгаши йиғилишидан бир кун олдин Оқ уйда Исроил бош вазири Бинямин Нетаняху Доналд Трамп билан музокаралар ўтказиши кутилмоқда. Исроил кенгаш режасини қабул қилди, аммо унинг низомини имзоламади.