Шавкат Мирзиёев: Ўзбекистон янги Ғазони барпо этишга ҳисса қўшишга тайёр
«Ўзбекистон «Тинчлик кенгаши»ни ташкил этиш бўйича тинчликпарвар ташаббусни қўллаб-қувватлади ва уни муваффақиятли амалга оширишда амалий иштирок этиш ниятини қатъий билдирди», — деб қайд этди давлат раҳбари.
У кенгаш фаолияти «Ғазо секторини иқтисодий ва ижтимоий қайта тиклаш учун қулай шароит шакллантириш имконини беришига» ишонч билдирди.
Шу билан бирга, президент таъкидлаганидек, ҳар қандай ташқи бошқарув механизми «албатта, сектор аҳолисининг ички қўллаб-қувватлашига таяниши лозим».
«Барча томонларнинг мувофиқлаштирилган саъй-ҳаракатлари можародан кейинги жараённинг барқарорлигини таъминлаш ва Ғазони тезроқ қайта тиклаш учун шароит яратиш имконини беради», — деб баёнот берди Шавкат Мирзиёев.
«Учрашувимиз халқаро бирдамлик, тинчликпарварлик ва Яқин Шарқдаги вазиятни яхшилашга бўлган умумий интилишнинг ёрқин ифодасидир. Биз ушбу тарихий имкониятдан иқтисодиёти гуллаб-яшнаган ва бутун аҳоли учун муносиб ҳаёт шароитларига эга бўлган янги Ғазони барпо этиш учун фойдаланишимиз керак», — деб таъкидлади у.
Шавкат Мирзиёев Вашингтондаги ҳозирги саммит АҚШ президенти Дональд Трампнинг «сиёсий иродаси ва прагматизми натижаси» эканини қўшимча қилди.
Шунингдек, у йиғилиш Дональд Трамп номидаги Тинчлик институтида бўлиб ўтаётганини рамзий деб атади (АҚШ Тинчлик институтига декабрь ойида шундай ном берилган).
«Мамлакатингиз аъло даражада ҳаракат қилмоқда. Сиз жуда яхши ишлаяпсиз. Ҳеч қандай муаммо йўқ. Ҳар сафар уни кўрганимда, у: „Бизда ҳаммаси яхши, ҳеч қандай муаммо йўқ“ дейди», — деди АҚШ президенти.