АҚШ Ўзбекистон фуқароси ва унга алоқадор компанияга қарши санкциялар киритди

АҚШ Молия вазирлигининг Хорижий активларни назорат қилиш бошқармаси (OFAC) 24 февраль куни эълон қилган янги санкциялар рўйхатига киберхавфсизлик соҳасидаги ноқонуний фаолият учун жами 4 нафар жисмоний шахс ва 3 та компания киритилди.

Расмий ҳужжатга кўра, Ўзбекистон фуқароси Азизжон Махмудович Мамашоев (1987 йилда туғилган) ва унга тегишли бўлган, БАА ҳамда Ўзбекистонда фаолият юритувчи Advance Security Solutions компанияси ҳам санкциялар остига тушган.

Мазкур қарор ушбу Азизжон Мамашоев ва компаниянинг киберқурилмалар ва дастурий таъминотлардаги заифликлар савдоси билан шуғулланувчи Operation Zero тармоғига кўмаклашгани билан изоҳланади. Азизжон Мамашоев Россияга алоқадор бўлган ва аввалроқ АҚШ томонидан санкцияланган Сергей Зеленюк ҳамда унинг брокерлик тармоғига моддий, технологик ва молиявий ёрдам берганликда айбланмоқда. Special Technology Services LLC FZ (STS) (БАА) ҳам тармоқнинг молиявий ва техник инфратузилмасини таъминлаган компания сифатида санкцияга учради.

Advance Security Solutions компанияси АҚШда ишлаб чиқилган технологиялардаги заифликларни топиш учун мукофотлар таклиф қилувчи ва ушбу маълумотларни ноқонуний тарзда сотувчи воситачи ташкилот сифатида қайд этилган.

Жорий этилган чекловларга кўра, Азизжон Мамашоев ва унинг компаниясининг АҚШ юрисдикциясидаги барча активлари ва банк ҳисоб рақамлари блокланади. Шунингдек, АҚШ фуқаролари ва компанияларига ушбу шахслар билан ҳар қандай иқтисодий алоқаларни олиб бориш, хизмат кўрсатиш ёки товар айирбошлаш қатъиян тақиқланади.

Бундан ташқари, санкциялар рўйхатига Россия фуқароси Олег Вячеславович Кучеров ҳам киритилди. OFAC уни Trickbot кибержиноятчилик гуруҳининг тахминий аъзоси деб атамоқда. Илк бор 2016 йилда аниқланган ушбу гуруҳ модулли зарарли дастурий таъминотлардан фойдаланган ҳолда киберҳужумлар уюштирган. Жумладан, улар АҚШ давлат органлари, шунингдек, шифохоналар ва тиббиёт муассасаларига нисбатан товон пули талаб қилувчи дастурлар орқали ҳужумлар уюштиришда айбланмоқда.

OFAC маълумотларига кўра, Мамашоев ва Кучеров аввалроқ Operation Zero билан ишчи алоқаларга эга бўлган. Улар Сергей Зеленюкка сезиларли молиявий, моддий ёки технологик ёрдам кўрсатгани ёхуд унинг манфаатлари йўлида ҳаракат қилгани учун санкциялар рўйхатига киритилган.