Магнус билан шов-шувли селфи тарихи: қозоғистонлик шахматчи барчасига ойдинлик киритди
Турнирнинг энг кўп муҳокама қилинган воқеаларидан бири Алуанинг дунёнинг энг кучли шахматчиси Магнус Карлсен билан тушган сурати бўлди. Алуа бундай эътиборни умуман кутмаганини тан олди. Қизиқарли жиҳати шундаки, Магнус билан суратга тушиш ғоясини унга франциялик гроссмейстер Этен Бакро берган.
“Ўтган йили Бакро ҳам Магнус билан худди шундай селфи тушганини кўриб, мен ҳам омадимни синаб кўришга қарор қилдим. Аммо бу сурат бундай шов-шувга сабаб бўлишини тасаввур ҳам қилмагандим”, дейди Алуа.
Тармоқларда қизғин муҳокамаларга сабаб бўлган яна бир вазият — Магнус ва Алуа ўртасидаги ўйин пайтида юзага келган кичик тушунмовчилик бўлди. Карлсен ўйин олдидан Нурман билан селфига тушди, бироқ қоидаларга кўра ҳакамдан унинг телефонини олиб қўйишни сўради. Кўпчилик буни зиддият сифатида талқин қилган бўлса-да, шахматчи қиз аслида нима бўлганига ойдинлик киритди.
“Бу мутлақо оддий ҳолат эди. Магнус ҳеч қандай эътироз билдирмади, у шунчаки ўйин қоидаларига қатъий амал қилинишини истади, холос”.
Магнус билан бўлган селфи воқеаси соясида Алуанинг натижалари ҳам эътибордан четда қолмади. У аёллар ўртасидаги баҳсларда кучли учликка кирди ва фреестйле бўйича Жаҳон чемпионатига йўлланмани қўлга киритди.
“Бу мен учун классик вақт назорати остида фреестйле ўйнаш бўйича биринчи тажриба эди. Шунчаки ўйин жараёнидан завқ олдим ва якунда шундай катта ютуққа эришдим”, дея қўшимча қилди қозоғистонлик шахматчи.
Эътиборли томони шундаки, ушбу сурат Алуанинг Instagram саҳифасида ярим миллиондан ортиқ лайк тўплади. Шунингдек, бу шов-шув ортидан унинг обуначилари сони қисқа вақт ичида 20 мингтага кўпайди.
Манба: daryo.uz