Сардор Умурзаков Стратегик ривожланиш ва ислоҳотлар агентлиги директори этиб тайинланди

Ўзбекистон президентининг тегишли фармони билан Сардор Уктамович Умурзаков Ўзбекистон президенти ҳузуридаги Стратегик ривожланиш ва ислоҳотлар агентлиги директори лавозимига тайинланди. Бу ҳақда Президент матбуот хизмати хабар қилди.

Шу муносабат билан у Ўзбекистон президентининг стратегик ривожланиш бўйича маслаҳатчиси лавозимидан озод этилди. У бу лавозимда 2025 йил июль ойидан бери ишлаб келаётганди.

Сардор Умурзаков (1977 йилда туғилган) Тошкент давлат иқтисодиёт университетини тамомлаган, сўнгра Рединг университети (Буюк Британия) магистратурасида ўқишни давом эттирган, PhD даражасига эга.

Узоқ вақт давомида Ўзбекистон банк тизимида ва хорижда — Европа тикланиш ва тараққиёт банкида (Лондон, Буюк Британия), шунингдек, молия органлари тузилмасида, хусусан, вазирлик ғазначилигида масъул лавозимларда ишлаган.

Ўз фаолияти давомида «Ўзбекчармпоябзали» уюшмаси бошқаруви раиси маслаҳатчиси (2014−2017), раис ўринбосари (2017−2018) ва «Ўзчармсаноат» уюшмаси раиси (2018−2019) лавозимларида ишлаган.

2019 йил январь ойида у Инвестициялар ва ташқи савдо вазири этиб тайинланганди, 2020 йил март ойида эса Қонунчилик палатаси томонидан бош вазир ўринбосари лавозимига тасдиқланган. 2022 йилдан 2023 йилгача президент администрациясини бошқарган.

Ўзбекистон Республикаси Президентининг стратегик ривожланиш бўйича маслаҳатчиси лавозими эса тугатилди.

Абдулла Мамасаатович Абдуқодиров бошқа ишга ўтиши муносабати билан Ўзбекистон президенти ҳузуридаги Стратегик ривожланиш ва ислоҳотлар агентлиги директори вазифасини бажарувчиси лавозимидан озод этилди.