«Интернетни ривожлантириш институти» автоном нотижорат ташкилоти бош директори Алексей Гореславскийнинг таъкидлашича, асосий вазифалардан бири ўсмирлар учун ёш авлодга қизиқарли бўлган, шу билан бирга, катталар томонидан мажбуран сингдирилмайдиган ҳолда маданий қадриятларни сақлашга хизмат қиладиган миллий контент яратишдир.

У болаларни тавсия алгоритмлари орқали ҳам тарқатиладиган зарарли контентдан ҳимоя қилишни ҳам муҳим йўналишлардан бири сифатида қайд этди.

Ўзбекистон рақамли технологиялар вазири маслаҳатчиси Камола Собирова эса болаларни кибертаҳдидлар, интернетдаги хавфли контент ва дипфейклардан ҳимоя қилиш бўйича Россия томони билан ҳамкорликни кенгайтириш ташаббусини илгари сурди.

У қўшма ишларни учта асосий йўналишга қаратишни таклиф қилди: хавфли контентга қарши курашиш, рақамли таҳдидларни аниқлашда сунъий интеллектдан фойдаланиш ҳамда болалар, ота-оналар ва педагогларнинг медиасаводхонлигини ошириш.

Унинг сўзларига кўра, Ўзбекистонда 112 тезкор ёрдам хизмати билан интеграциялашган болаларни ҳимоя қилиш бўйича ягона электрон платформани яратиш ишлари ҳам олиб борилмоқда.

Форумда таълим муассасаларида болалар хавфсизлигини таъминлаш масаласига ҳам алоҳида эътибор қаратилди. Ўзбекистон мактабгача ва мактаб таълими вазирининг биринчи ўринбосари Ойбек Юлдашев кибербуллинг, интернет жиноятлари ва ўқувчиларнинг номақбул контентга дуч келиши ҳолатларига жавоб қайтаришнинг ягона механизмини жорий этиш зарурлигини таъкидлади.

Унинг фикрича, мактабларда болаларнинг мурожаатларини қабул қиладиган ва маълумотларни педагоглар ҳамда тегишли хизматларга, жумладан, 112 рақами орқали етказадиган масъул ходимларни белгилаш лозим.

Форум иштирокчилари ёш авлод учун хавфсиз рақамли макон яратиш, медиасаводхонликни ривожлантириш ва сифатли ахборот муҳитини шакллантиришда Ўзбекистон ва Россия ҳамкорлигини мустаҳкамлаш муҳимлигини қайд этди.