Тошкентда эркак 3 ёшли болани пичоқлаб ўлдирди

Эркак марҳумнинг онаси билан унинг уйида никоҳсиз яшаб келган ва қотилликга уларнинг ўртасидаги ўзаро жанжал сабаб бўлган.

Эридан ажрашган аёлнинг йигити ундан ўч олиш мақсадида аёлнинг ўғлини пичоқлаб ўлдиргани айтилган хабар ижтимоий тармоқларга сиздирилди. Ушбу ҳолат юзасидан Бош прокуратура матбуот хизмати раҳбари Ҳаёт Шамсутдинов UzNews.uz'га маълумот берди.

Аниқланишича, жорий йилнинг 9 июль куни Яшнобод туман Яккатол кўчасидаги кўп қаватли уйда ижара асосида яшаб келаётган 1993 йилда туғилган эркак, ушбу манзилда қонуний никоҳдан ўтмасдан яшаб келган аёл билан ўзаро жанжаллашган. Бунинг оқибатида, аёлнинг биринчи турмушидан 2021 йилда туғилган ўғил фарзандига ўткир тиғли жисм (пичоқ) билан бир неча маротаба тан жароҳатлари етказиб, ҳодиса жойидан яширинган. Бола шифохонага олиб келингунга қадар вафот этган.

Мазкур ҳолат бўйича Яшнобод туман прокуратураси томонидан ЖКнинг 97-моддаси (қасддан одам ўлдириш) билан жиноят иши қўзғатилиб, гумонланувчи процессуал тартибда ушланган.