Ўзбекистондаги тижорат банклари ўтган йилда 10 триллион сўм соф фойда олган

Марказий банк матбуот хизматининг маълум қилишича, 2022 йилда банклар томонидан аҳолига 65,3 триллион сўм миқдорида ёки 2021 йилга нисбатан 45 фоиз ортиқ кредитлар ажратилган. Ушбу кредитлар таркибида автокредитлар 10,9 триллион сўмга, ипотека кредитлари 10,6 триллион сўмга ва микроқарзлар 6,2 триллион сўмга ўсган.
Ушбу кредитларнинг 68 фоизи, яъни 137,8 триллион сўми корпоратив ва 32 фоизи, яъни 65,3 триллион сўми аҳолига ажратилган кредитлар ҳиссасига тўғри келади. Ажратилган кредитларнинг 31 фоизи қисқа муддатли ва 69 фоизи узоқ муддатли, валюталар қирқимида эса 65 фоиз кредитлар миллий валютада ва 35 фоиз хорижий валютадаги кредитлар ҳиссасига тўғри келади.

Қораверса, шу даврда тижорат банклари томонидан 136 триллион сўмлик кредитлар сўндирилган. Қайтувчанлик даражаси эса 67 фоизни ташкил этган. Банкларнинг жами кредит қўйилмалари қолдиғи 2023 йил 1 январь ҳолатига 390 триллион сўмни ташкил этиб, уларнинг 74 фоизи корпоратив кредитлар, 26 фоизи чакана кредитлар ҳиссасига тўғри келади. Жами кредит портфели қолдиғи 2021 йилнинг мос даврига нисбатан 20 фоизга ёки 63,7 триллион сўмга, хусусан, корпоратив кредитлар 13 фоизга яъни 32,2 триллион сўм ва аҳоли кредитлари 45 фоизга аниқроғи, 31,5 триллион сўмга ўсган.

Яна бир маълумот, ўтган йил якуни бўйича тижорат банклари 10 триллион сўм соф фойда олган. Бунда банклар томонидан ўтган йилнинг январь-декабрь ойлари давомида 95 триллион сўм миқдорида даромадлар олиниб, 85 триллион сўмлик харажатлар амалга оширилган.