Ўзбекистонга Leapmotor брендидаги автомобиллар импорти чекланди

C16 русумли русумли автомобилларни синовдан ўтказиш чоғида халқаро хавфсизлик стандартлари бузилиши аниқланганидан кейин шундай қарор қабул қилинди.

Техник жиҳатдан тартибга солиш агентлиги Хитойнинг Leapmotor русумли енгил автомобилларини сертификатлаштиришни вақтинча тўхтатиб туриш тўғрисида сертификатлаштириш органларига огоҳлантириш хатлари юборди, бунга сабаб C16 русумли русумли автомобилни текширишда нуқсонлар аниқланган.

Қайд этилишича, аниқланган номувофиқлик электроника ва бошқа автотранспорт тизимларининг ишлашида муаммоларга, айрим ҳолларда эса уларнинг ишдан чиқишига олиб келиши мумкин.

Агентлик истеъмолчилар ҳуқуқларини ҳимоя қилиш мақсадида Leapmotor автомашиналарини М1 сертификатига олиш учун аризалар аниқланган камчиликлар бартараф этилмагунча тўхтатиб турилишини маълум қилди.

Мазкур ҳолат юзасидан Техник жиҳатдан тартибга солиш назорати инспектсияси ҳам изоҳ берди.

Маълум қилинишича, яқинда лаборатория шароитида ушбу русумдаги автомобил синови ўтказилган. Натижалар шуни кўрсатдики, у халқаро стандартларга, хусусан, БМТ томонидан белгиланган хавфсизлик талабларига жавоб бермайди (рухсат этилган чегарадан 16 баробар ошиб кетган).

«Ўзбекистон илмий-синов ва сифат назорати маркази» (O‘ZAK.SL.0309) давлат муассасасининг синов лабораторияси (мажмуаси) томонидан 2025-йил 10-март куни SB — 0309-388/25-сонли синов баённомасига асосан UzTR.237-016:2017 стандарти, илова № 3, п.44 бўйича «Устуворлик ва ташқи электромагнит нурланишга бардошлилик (Кенг полосали электромагнит шовқинлар)» талабларига номувофиқлик ҳолати аниқланган.

Электромагнит мослашувчанлик (EMS) – электрон қурилмалар ва тизимлар ўртасида электромагнит майдонлар таъсирини минималлаштириш учун ўтказиладиган муҳим синовдир. Бундай синовлар транспорт воситалари учун ҳам зарур, чунки электромагнит майдонларнинг автомобил электрон тизимларига таъсири хавфсизликка жиддий таъсир қилиши мумкин.

Бундан ташқари, электромагнит нурланишнинг инсон саломатлигига таъсири ҳам муҳим масала ҳисобланади. Тадқиқотларга кўра, юқори даражадаги электромагнит майдонлар организмга салбий таъсир кўрсатиши, жумладан, асаб тизими, юрак-қон томир тизими ва ҳатто саратон касалликлари хавфини ошириши мумкин.

«Шу сабабли, автомобил танлашда халқаро талаб ва стандартларга жавоб берадиган маҳсулотларни афзал кўришни ҳамда автомобил танлашда хавфсизлик меъёрларига риоя қилган ҳолда расмий дилерларга мурожаат қилишингизни сўраймиз», — дейилади хабарда.