«АҚШда ноқонуний яшаётган Ўзбекистон фуқароларига ўз ихтиёрлари билан қайтишни маслаҳат бераман» — элчи

АҚШнинг Ўзбекистондаги элчиси Жонатан Ҳеник АҚШда ноқонуний яшаётган Ўзбекистон фуқароларига мурожаат қилиб, уларни ўз ихтиёри билан мамлакатига қайтишга чақирди.

Видеомурожаатнинг илк сонияларида АҚШ давлат котиби Марко Рубионинг қуйидаги сўзлари келтирилган: «Трамп маъмурияти ноқонуний миграцияни тўхтатишга ва чегараларимиз ҳамда фуқароларимизни ҳимоя қилишга эътибор қаратмоқда».

«Сўнгги бир неча йил ичида кўрганимиздек, кўплаб ўзбекистонликлар Марказий Америка ҳудудидаги хавфли йўллар орқали АҚШга киришган. Бунинг натижасида тахминан АҚШда ноқонуний бўлиб турган минглаб ўзбекистонликлар бор», — деди элчи.

«Очиғини айтганда, мен бу шахсларга Ўзбекистонга ўз ихтиёрлари билан қайтишни маслаҳат берардим. Чунки, акс ҳолда, улар АҚШда қамоққа олиниши ёки депортация қилиниши мумкин», — деб таъкидлади дипломат.

Куча АҚШ президенти Дональд Трамп маъмурияти Африка, Осиё ва Шарқий Европанинг бир қанча давлатлари билан депортация қилинган мигрантларни қабул қилиш бўйича келишувга эришмоқчи экани ҳақида ёзгандик. Номзодлар орасида Ливия, Руанда, Молдова, Мўғулистон ва Косово бор.

• АҚШ президенти Дональд Трамп лавозомига киришганидан сўнг ноқонуний мигрантларга қарши кенг кўламли тозалаш ишларини бошлади. 2025 йил февраль ойида АҚШ Осиё давлатлари, жумладан, Ўзбекистондан келган 119 мигрантни Панамага депортация қилди. Панама ТИВнинг аниқлик киритишича, етиб келган муҳожирлар АҚШ чегарасини ноқонуний кесиб ўтгандан сўнг қўлга олинган ва улар муқаддам судланмаган. Ўшанда 975 нафар ўзбекистонлик АҚШдан депортация хавфи остида тургани очиқланганди.
• Орадан бир ҳафта ўтгач, Ўзбекистон ўз фуқароларини Қўшма Штатлардан хавфсиз депортация қилиш масалалари бўйича АҚШ ва Лотин Америкаси давлатлари расмийлари билан алоқага чиққани маълум бўлди. АҚШдаги дипломатик ваколатхоналар сўровларни қабул қилишда «қаерда бўлишидан қатъи назар, барча фуқароларга тўлиқ ёрдам кўрсатади», дея таъкидлади ТИВ.
• АҚШдан депортация қилиниб, Коста Рикага юборилиши режалаштирилган 7 нафар Ўзбекистон фуқароси 25 февралда Нью Йорк-Тошкент йўналиши бўйича ватанга олиб келинди. Шунингдек, март ойи бошида АҚШ томонидан Коста Рикага депортация қилиниши керак бўлган яна 10 нафар ўзбекистонликлар Тошкентга қайтарилиши ҳақида хабар берилганди.
• АҚШ ҳукумати 2024 йилнинг илк 9 ойида 572 нафар Ўзбекистон фуқаросини ватанига депортация қилганди. Бу 2023 йилнинг шу давридагидан 6,5 баробар кўп.