«Ўзбекистон ва Марказий Осиё мамлакатлари Европа учун ишончли ҳамкорлардир» — Урсула фон дер Ляйен

Ўзбекистон президенти Шавкат Мирзиёев 3 апрель куни «Марказий Осиё — Европа Иттифоқи» биринчи саммити доирасида Европа кенгаши президенти Антониу Кошта ва Европа комиссияси президенти Урсула фон дер Ляен билан учрашув ўтказди, дея хабар берди Президент матбуот хизмати.

Ўзбекистон билан Европа Иттифоқи ўртасидаги кўп қиррали ҳамкорликни, энг аввало, савдо-иқтисодиёт ва инвестиция соҳаларида ривожлантириш ва мустаҳкамлаш масалалари атрофлича кўриб чиқилди.

Турли даражалардаги фаол мулоқотлар ва сермаҳсул алмашинувлар, амалий ҳамкорликнинг институционал механизмлари доирасида самарали ишлар олиб борилаётгани алоҳида мамнуният билан қайд этилди. Кенгайтирилган шериклик ва ҳамкорлик тўғрисидаги битим имзоланишга тайёрланмоқда.

«Ўзбекистоннинг Европа Иттифоқи мамлакатлари билан товар айирбошлаш ҳажми барқарор ортиб бормоқда. Европанинг етакчи компаниялари иштирокидаги инвестиция лойиҳалари портфели 30 миллиард евродан зиёдни ташкил этмоқда. Мамлакатимиз Европа тикланиш ва тараққиёт банкининг йирик бенефициари ҳисобланади, Тошкент шаҳрида Европа инвестиция банкининг минтақавий ваколатхонаси очилмоқда», — дейилади матбуот хизмати хабарида.

Таъкидланишича, EИнинг бош институтлари раҳбарлари Янги Ўзбекистонни барпо этиш бўйича амалга оширилаётган иқтисодий ислоҳотлар дастурини, шунингдек, Марказий Осиёда яхши қўшничилик, ишонч ва шерикликни мустаҳкамлаш борасидаги сиёсатни юксак баҳолаган ва қатъий қўллаб-қувватлашларини билдирган.

Музокараларда асосий эътибор инновациялар, «яшил» энергетика, тоғ-кон тармоғи, қишлоқ хўжалиги, транспорт, логистика, рақамлаштириш ва бошқа йўналишларда қўшма дастур ва кооперация лойиҳаларини илгари суришга қаратилди.

Туризм, маданият, фан, таълим ва соғлиқни сақлаш соҳаларидаги фаол алмашинувларни давом эттириш муҳимлиги қайд этилди.

Бўлажак «Марказий Осиё — Европа Иттифоқи» форматидаги биринчи олий даражадаги саммит кун тартибидаги масалалар ҳамда Европанинг «Глобал дарвоза» стратегияси доирасида икки минтақанинг ўзаро боғлиқлигини кучайтириш истиқболлари муҳокама қилинди.

Халқаро ва минтақавий сиёсатнинг долзарб жиҳатлари, жумладан, Афғонистоннинг ижтимоий-иқтисодий ривожланишига кўмаклашиш масалалари юзасидан ҳам фикр алмашилди.

Фото: Ursula von der Leyen / X

Урсула фон дер Ляен ўзининг Х саҳифасида саммитни ташкил этгани учун Ўзбекистон президентига миннатдорчилик билдирди.

«Ўзбекистон ва Марказий Осиё давлатлари Европа учун ишончли ҳамкорлардир. Бизни фаол савдо-сотиқ, ғоя ва инновациялар алмашинувига асосланган кўп йиллик дўстлик боғлаб туради. Бу яқин ва стратегик ҳамкорликнинг мустаҳкам пойдеворидир,» — дея ёзди у.

«Эртага биз Марказий Осиё билан янги стратегик ҳамкорликни йўлга қўямиз. Бу шуни англатадики, биз бир-биримизга ишонч билдира оламиз. Бугунги дунёда эса бу ҳар қачонгидан ҳам муҳимроқдир,» — дея таъкидлади Европа комиссияси раиси.
https://twitter.com/vonderleyen/status/1907708670709813638?ref_src=twsrc%5Etfw%7Ctwcamp%5Etweetembed%7Ctwterm%5E1907708670709813638%7Ctwgr%5Ec332281ce89e064bad91625a4790dea84a7bd0df%7Ctwcon%5Es1_c10&ref_url=https%3A%2F%2Fwww.gazeta.uz%2Fru%2F2025%2F04%2F03%2Fuzbekistan-eu%2F